اسلام آباد(این این آئی(نگران وفاقی وزیرداخلہ سرفرازبگٹی نے کہا ہے کہ ایک ملزم کو جہاز سے گرفتار کرنے کیلئے کوئی بڑی فورس نہیں چاہیے ہوتی، نوازشریف کی گرفتاری کیلئے تیار ہیں، نوازشریف ماضی میں بھی بیٹی کیساتھ گرفتار ہونے آئے تھے، برصغیر کا ایک ہی لیڈر ہے جو گرفتاری سے ڈرتا ہے،تعصب کہیں یا کچھ اور سب کو پتہ ہے ،چیئرمین پی ٹی آئی سابق وزیراعظم ہیں انھیں جیل میں سہولتیں ملنی چاہئیں،چیئرمین پی ٹی آئی عدالتوں کی ڈارلنگ ہیں کئی کیسز میں ریلیف لے چکے ہیں،ماضی میں ریاست نے ہمیشہ ماں کا کردار ادا کیا پہلی مرتبہ باپ کا کردار ادا کر رہی ہے، ریاست کو ہمیشہ باپ کا کردار ادا کرنا چاہیے،سافٹ رویہ نہیں رکھنا چاہیے،9مئی کو پاکستان کیخلاف آرگنائزڈ سازش ہوئی ہے، 9مئی میں جو بھی ملوث تھے پراسیکیوشن انھیں ٹرائل کے لیے بھیج رہی ہے، الیکشن ہونے والے ہیں اور 9مئی کے واقعات کو بھلا دیا جائے ایسا نہیں ہوسکتا۔

نجی ٹی وی کو انٹرویودیتے ہوئے سرفرازبگٹی نے کہاکہ ایئرپورٹ حساس جگہ ہے وہاں ویسے بھی مجمع کو اجازت نہیں دیں گے،نوازشریف کو عدالت سے ضمانت نہیں ملی تو گرفتار کریں گے،میرے خیال میں نواز شریف خود بھی گرفتار ہونا ہی چاہیں گے۔سرفرازبگٹی نے کہا کہ نوازشریف ماضی میں بھی بیٹی کے ساتھ گرفتار ہونے آئے تھے، برصغیر کا ایک ہی لیڈر ہے جو گرفتاری سے ڈرتا ہے،تعصب کہیں یا کچھ اور سب کو پتہ ہے چیئرمین پی ٹی آئی گرفتاری سے ڈرتے ہیں۔انھوں نے کہاکہ چیئرمین پی ٹی آئی کو جیل رولز کے مطابق سہولتیں دی جارہی ہیں،چیئرمین پی ٹی آئی سابق وزیراعظم ہیں انھیں جیل میں سہولتیں ملنی چاہئیں،چیئرمین پی ٹی آئی عدالتوں کی ڈارلنگ ہیں کئی کیسز میں ریلیف لے چکے ہیں۔

انہوںنے کہاکہ ماضی میں ریاست نے ہمیشہ ماں کا کردار ادا کیا پہلی مرتبہ باپ کا کردار ادا کر رہی ہے، ریاست کو ہمیشہ باپ کا کردار ادا کرنا چاہیے،سافٹ رویہ نہیں رکھنا چاہیے۔نگراں وزیرداخلہ نے کہاکہ پاکستان ایک سافٹ اسٹیٹ بن چکا ہے، کسی ڈیل کا حصہ تھا نہ کسی ڈیل کے بارے میں مجھے پتہ تھا،جولوگ ڈیل کی باتیں کر رہے ہیں وہ اس پر بات کر سکتے ہیں، مصالحت اچھی چیزہوتی ہے لیکن کس کے ساتھ یہ بھی اہم ہوتی ہے۔انھوں نے کہا کہ نگراں وزیراعظم کے بیان کو سیاق وسباق سے ہٹ کر لیا گیا ہے،پاکستان میں ایسا ہوا ہے کہ سابق وزیراعظم جیلوں میں گئے ہیں۔

انہوںنے کہاکہ 9مئی کو پاکستان کے خلاف آرگنائزڈ سازش ہوئی ہے، 9مئی میں جو بھی ملوث تھے پراسیکیوشن انھیں ٹرائل کے لیے بھیج رہی ہے، الیکشن ہونے والے ہیں اور 9مئی کے واقعات کو بھلا دیا جائے ایسا نہیں ہوسکتا۔انھوں نے کہا کہ الیکشن کی وجہ سے کسی کو چھوڑ دینا ایسا نہیں ہو سکتا،ملک میں ایک سسٹم ہے جس نے 9مئی کی سازش کی ہے کیا اس کو سزانہ دی جائے،چیئرمین پی ٹی آئی سے متعلق کیسز چل رہے ہیں، عدالتیں فیصلہ کریں گی۔نگراں وزیر داخلہ نے کہا کہ چیئرمین پی ٹی آئی کوبعض کیسزمیں ریلیف بھی ملا ہے، چیئرمین پی ٹی آئی سے متعلق فیصلہ عدالتوں نے کرنا ہے ہم نے نہیں، عدالتیں فیصلہ کرسکتی ہیں چیئرمین پی ٹی آئی الیکشن سے پہلے باہر آئیں گے یا نہیں۔