اسلام آباد(این این آئی)وزیراعظم شہباز شریف نے اسمبلیاں تحلیل کرنے کی تاریخ بتا تے ہوئے کہاہے کہ9اگست کو اسمبلیاں تحلیل کر دی جائیں گی،اسمبلی توڑنے کی سمری 9اگست کو بھیج دیں گے،نگراں وزیر اعظم کیلئے(آج)جمعہ سے مشاورت ہوگی، آئندہ 2سے 3روز میں مشاورت کا عمل مکمل کرلیں گے۔وزیر اعظم شہباز شریف کی طرف سے ارکان قومی اسمبلی و سینیٹ کے اعزاز میں پر تکلف عشائیے کا اہتمام کیا گیاجس میںوفاقی وزراء اور حکومتی اتحادی جماعتوں کے پارلیمانی روہنمائوں نے شرکت کی،عشایئے میں شرکاء کی من پسند کھانوں سے تواضع کی گئی۔

عشائیہ کے شرکاء سے خطاب کرتے ہوئے وزیر اعظم شہباز شریف نے کہا کہ 9اگست کو اسمبلی تحلیل ہو گی، اسمبلی توڑنے کی سمری 9اگست کو بھیج دیں گے، تمام اتحادیوں اور سیاسی قائدین سے مشاورت ہو گئی ہے، قائد مسلم لیگ (ن) نواز شریف سے بھی مشاورت ہوگئی ہے۔ذرائع کے مطابق شہباز شریف نے کہاکہ نگراں وزیر اعظم کیلئے آج جمعہ سے مشاورت ہوگی، آئندہ 2سے 3روز میں مشاورت کا عمل مکمل کرلیں گے۔وزیراعظم نے کہا کہ مشکل وقت میں حکومت سنبھالی، ہر طرف خطرات تھے، ملک ڈیفالٹ ہونے کے قریب تھا، 15ماہ میں تمام تنقید کے باوجود ریاست کو بچایا، آج ہمارا ضمیر مطمئن ہے کہ ہم نے سیاست کی قربانی دے کر ملک کو بھنور سے نکالا۔شہباز شریف نے کہا کہ تحریک انصاف کی حکومت نے جو کانٹے بوئے تھے وہ ہمیں ہٹانا پڑے،اس شخص کی ضد نے ہر ادارہ اور شعبہ تباہ کر دیا تھا، اتحادی حکومت کے تعاون سے ہر مشکل پر قابو پایا۔

انہوں نے کہا کہ آئی ایم ایف سے معاہدہ آسان نہیں تھا، یہ پل صراط بھی عبور کیا، آئندہ چند روز میں ہماری حکومت ختم ہو جائے گی، کوشش ہے کہ سب کیلئے قابل قبول نگران سیٹ اپ تشکیل دیا جائے۔وزیر اعظم نے ارکان پارلیمنٹ کا گرمی جوشی سے استقبال کیا،شہباز شریف نے ارکان پارلیمنٹ کو وزیر اعظم ہائوس میں خوش آمدید کہا، وزیر اعظم نے فردا فردا ارکان کی نشستوں پر جا کر ان سے ملاقات کی۔عشائیہ میں چیئرمین سینیٹ و سپیکر قومی اسمبلی نے بھی شرکت کی،وزیر خزانہ اسحاق ڈار، وزیر اطلاعات مریم اورنگزیب سمیت وفاقی وزراء اور حکومتی اتحادی جماعتوں کے پارلیمانی روہنمائوں نے بھی شرکت کی۔

ارکان پارلیمنٹ کے لئے وزیر اعظم کی جانب سے پرتکلف عشائیہ میں من پسند کھانوں کا اہتمام کیا گیا،چکن منچورین، چکن کڑاہی، مٹن کڑاہی، باربی کیو مینیو کا حصہ تھیں، میٹھی ڈشز بھی ارکان پارلیمنٹ کی تواضع میں پیش کی گئیں۔ذرائع کے مطابق وزیر اعظم شہباز شریف نے عشائیہ سے قبل پارلیمانی رہنمائوں سے ملاقات کی، ملاقات میں ملکی سیاسی صورتحال پر تبادلہ خیال ہوا، وزیر اعظم شہباز شریف نے پارلیمانی رہنمائوں سے نگران وزیر اعظم سے متعلق مشاورت کی۔