لاہور( این این آئی)پنجاب حکومت نے ریٹائر ہونے والے سرکاری ملازمین کو ایک سال تک 65فیصد تنخواہ کی ادائیگی کا بڑا اعلان کر دیا ۔نگران وزیر اطلاعات عامر میر نے نگران وزیر صنعت و تجارت ایس ایم تنویر اور سیکرٹری خزانہ مجاہد شیر دل کے ہمراہ آئندہ چار ماہ کیلئے پیش کئے گئے بجٹ پر بریفنگ دی ۔ سیکرٹری خزانہ مجاہد شیر دل نے بتایا کہ سرکاری ملازمین کے ریٹائر ہونے پر اس کی تنخواہ بند ہو جاتی ہے جبکہ اسے پنشن کی دستاویزات کی تیاری میں ایک سے ڈیڑھ سال کا عرصہ لگ جاتا ہے ۔ صوبائی کابینہ کی منظوری سے نوٹیفکیشن جاری کیا جارہا ہے جس کے مطابق اب سرکاری ملازمین کی ریٹائرمنٹ پر تنخواہ بند نہیں ہو گی بلکہ اسے ایک سال تک 65فیصد تنخواہ ملتی رہے گی اور اس دوران اس کی پنشن کی دستاویزات تیار ہو جائیں گی۔