لاہور( این این آئی)جمعیت علمائے اسلام پاکستان کے وفد نے مولانا خان محمد شیرانی کی سربراہی میں چیئرمین پاکستان تحریک انصاف عمران خان سے تفصیلی ملاقات کی ۔تحریک انصاف کے میڈیا سیل کی جانب سے جاری اعلامیے کے مطابق ملاقات میں ملکی سیاسی صورتحال، آئین و عدلیہ کے خلاف حکومتی یلغار اور جمہوریت و جمہوری اقدار کے قتل عام پر گہری تشویش کا اظہار کیا گیا ۔

ملاقات میں ملک بھر میں پاکستان تحریک انصاف اور اتحادیوں کے خلاف جبر و فسطائیت کے جاری بدترین سلسلے کی شدید مذمت کی گئی ۔ اعلامیے میں کہا گیا کہ ملاقات میں 9 مئی کو ملک بھر میں پرامن احتجاج کو پرتشدد بنانے اور جلا ئوگھیرا ئوکے ساتھ نہتے پاکستانیوں کو گولیوں کا نشانہ بنانے کی بھی شدید مذمت کی گئی ۔اعلامیے میں کہا گیا کہ پرامن مظاہرین کی صفوں میں داخل کئے گئے انتشار پسندوں کے ہاتھوں سرکاری املاک میں توڑ پھوڑ اور جلا ئوگھیرا ئوکی بھی شدید مذمت کی گئی ۔ ملاقات میں رہنمائوں نے کہا کہ 9 مئی کو جلا ئوگھیرا ئوسے املاک کو نقصان پہنچانے، 25 نہتے پاکستانیوں کو شہید 700 سے زائد کو زخمی کرنے والوں کو کٹہرے میں لانے کیلئے جامع تحقیقات کی ضرورت ہے۔تحریک انصاف کے خلاف ملک بھر میں جاری غیرقانونی کریک ڈائون فوری طور پر روکنے ،قیادت، کارکنان خصوصاً خواتین کارکنان کو فوری طور پر رہا کرنے پر کا مطالبہ کیا گیا ۔ملاقات میں عدالت عظمی اور چیف جسٹس آف پاکستان سے مکمل یکجہتی کا اظہار کیا گیا ۔ اعلامیے میں عدالت عظمیٰ سے مطالبہ کیا گیا کہ آئین، بنیادی حقوق اور ریاستی جبر و فسطائیت سے شہریوں کو تحفظ فراہم کرنے کیلئے آگے بڑھ کر کردار ادا کرے ۔پنجاب اور پختونخوا ہ میں غیرقانونی نگران حکومتوں کے خاتمے اور آئین کے تحت عام انتخابات کے ذریعے منتخب حکومتوں کے قیام کیلئے عدالتی فیصلے پر عملدرآمد یقینی بنایا جائے ۔پاکستان تحریک انصاف اورجمعیت علمائے اسلام پاکستان کے مابین سیاسی اشتراک عمل کو مزید وسعت و تحرک دینے پر بھی مکمل اتفاق کیا گیا ۔