کراچی (این این آئی) ایس ایچ او سائٹ سپر ہائی وے فیصل جعفری عرف کنگ نے شرمناک حرکت کرتے ہوئے زیادتی کی شکار متاثرہ خاتون کی ویڈیو بنا کر سوشل میڈیا پر وائرل کر دی۔تفصیلات کے مطابق کراچی سائٹ سپر ہائی کے ایس ایچ او فیصل جعفری عرف کنگ نے جبری زیادتی کا شکار ہونے والی فریادی خاتون کی ویڈیو بنا کر سوشل میڈیا پر وائرل کر دی۔

خاتون اپنے ساتھ ہونے والی درندگی کا واقعہ بتاتی رہی اور ایس ایچ او ویڈیو بناتا رہا، خاتون رو رو کر مختلف زاویوں سے زیادتی کی تفصیلات بتاتی رہی اور ایس ایچ او سوال کرتا رہا۔ایس ایچ او فیصل جعفری عرف کنگ نے زیادتی کرنے والے ملزم سے بھی سوالات کیے، ایس ایچ او ہر جملے کے بعد گالی دیتے ہوئے ملزم کو برا بھلا کہتا رہا۔ایس ایچ او نے ملزم سے مکالمہ کرتے ہوئے کہا تو دیکھ اب تیرے ساتھ کیا ہوتا ہے۔ ایس ایچ او فیصل جعفری کے خلاف بالا افسران کو متعدد شکایات موصول ہو چکی ہیں، سائٹ سپر ہائی وے پر ایرانی ڈیزل کے کئی ڈپو موجود ہیں، خود کو کنگ کہلانے والا ایس ایچ او مبینہ طور پر جوا خانہ چلانے میں بھی ملوث ہے۔