اسلام آباد (این این آئی)حکمران جماعتوں نے آرمی چیف جنرل سید عاصم منیر کے بارے میں عمران خان کے بیان کی شدید مذمت کرتے ہوئے کہاہے کہ ضمانتوں کی بارش ہوتے ہی 60 ارب کے چور نے آرمی چیف کے خلاف بیان دیا ،عمران خان کا بیان ان کے مذموم عزائم کا آئینہ دار اور پوری قوم کے لئے لمحہ فکریہ ہے،بیان پیغام ہے کہ میرے سہولت کار نہ بنے تو آپ کو بدنام کروں گا ۔

جاری اعلامیہ میں کہاگیاکہ گھڑی فروش توشہ چور میرٹ پر آرمی چیف کی تقرری کی مخالفت کرتا رہا ۔ بیان میں کہاگیاکہ بیان پاکستان کے عوام اور فورسز کے قاتل دہشت گردوں کی حمایت کا اعلان عام ہے ،یہ فوج اور ملک دشمنی کے ایجنڈے کا واضح ثبوت اور اعتراف ہے ۔ بیان میں کہاگیاکہ یہ فوج اور اس کی قیادت سے ذاتی دشمنی، عناد اور انتقامی جذبے کا واضح ثبوت ہے ۔ بیان میں کہاگیاکہ شمشیر کا باوقار اعزاز رکھنے والے آرمی چیف جنرل سید عاصم منیر ایک انتہائی قابل، ایماندار اور پروفیشنل سولجر ہیں ۔

بیان کے مطابق فارن فنڈنگ جن مقاصد کے لئے دی گئی، اس پر عمل ہوتا ہوا نظر آرہا ہے ۔ بیان میں کہاگیاکہ آرمی چیف کی قیادت میں فوج دہشت گردی کے خلاف جنگ لڑی رہی ہے، ایسے میں فوج اور اس کے سپہ سالار پر حملے کئے جارہے ہیں ۔ بیان میں کہاگیاکہ گھٹیا الزامات دہشت گردوں کے خلاف جنگ پر اثرانداز ہونے کی مذموم کوشش ہے۔ بیان میں کہاگیاکہ پاکستان کے عوام اور ان کی نمائندہ جماعتیں دہشت گردی سے برسرپیکار فوج، اس کی قیادت اور شہدا کے ساتھ ہے اور ان کو بدنام کرنے والے عناصر کے خلاف ڈھال ہے۔