ویانا(نیوزڈیسک) چیئرمین پاکستان اٹامک انرجی کمیشن محمد نعیم نے کہا ہے کہ پاکستان نیوکلیئر انرجی ویژن 2050 کے تحت 40 ہزار میگا واٹ بجلی پیدا کرنے کا خواہشمند ہے۔ویانا میں 59ویں بین الاقوامی ایٹمی توانائی ایجنسی کی جنرل کانفرنس کے دوران خطاب کرتے ہوئے نعیم نے کہا کہ پی اے ای سی نے ایک منصوبہ مرتب کیا ہے جس کے ذریعے 8000 میگا واٹ بجلی پیدا کی جاسکتی ہے جس کے ذریعے سے ملک کے توانائی بحران پر قابو پانے میں مدد ملے گی۔انہوں نے بتایا کہ پی اے ای سی عوام کے لیے 18 اونکولوجی ہسپتال کی صورت میں عوام کو پرامن نیوکلیئر ٹیکنالوجی فراہم کررہا ہے جہاں ملک کے 80 فیصد کینسر کے مریضوں کا علاج کیا جاتا ہے۔انہوںنے کہاکہ پی اے ای سی مستقبل میں اس طرح کے مزید طبی مرکز قائم کرنے کا ارادہ رکھتا ہے۔