اسلام آباد(این این آئی)قومی اسمبلی اجلاس میں شرکت کی اجازت نہ ملنے کے خلاف پاکستان تحریک انصاف کے کراچی سے اراکین قومی اسمبلی نے پارلیمنٹ ہاؤس کے مرکزی گیٹ پر دھرنا دیا۔پی ٹی آئی کے کراچی سے ارکان اسمبلی نے قومی اسمبلی کے اجلاس میں شرکت کا اعلان کیا تھا تاہم ترجمان قومی اسمبلی نے اپنے بیان میں کہا کہ پی ٹی آئی اراکین قومی اسمبلی کے اجلاس میں شرکت نہیں کر سکتے کیونکہ وہ اب ممبر اسمبلی نہیں رہے۔
پی ٹی آئی اراکین عالمگیر خان، عطااللہ، سیف الرحمان پارلیمنٹ ہاؤس پہنچے تاہم اسلام آباد پولیس نے پی ٹی آئی اراکین کو پارلیمنٹ ہاؤس میں داخل ہونے سے روک دیا، اسلام آباد پولیس کی بھاری نفری پارلیمنٹ ہاؤس کے مرکزی دروازے پر تعیناترہی، اسلام آباد پولیس کے علاوہ ایف سی اور پارلیمانی سکیورٹی اسٹاف بھی مرکزی گیٹ پر تعینات رہا۔احتجاج کے باعث ایران کے سفیر پارلیمنٹ ہاؤس کے اندر محصور ہوگئے تھے، سیکیورٹی نے سفیر کو متبادل راستے سے روانہ کیا۔
مستعفی اراکین نے کہا کہ 5 منٹ میں پارلیمنٹ داخلے کی اجازت نہ دی گئی تو اگلا لائحہ عمل دیں گے۔بعد ازاں پاکستان تحریک انصاف (پی ٹی آئی) کے 7 اراکین جمعرات کو دوبارہ پارلیمنٹ آنے کا اعلان کرکے مرکزی گیٹ پر احتجاج کے بعد واپس چلے گئے۔دھرنا دینے والوں میں فہیم خان، آفتاب حسین صدیقی، سیف الرحمان، آفتاب جہانگیر، اسلم خان، عطااللّٰہ خان اور جہانگیر عالم شامل تھے۔
