اسلام آباد (این این آئی)سپریم کورٹ میں پنجاب اور خیبرپختونخواہ اسمبلیوں کی بحالی کیلئے درخواست دائر کر دی گئی جس میں کہاگیا ہے کہ دونوں اسمبلیاں وزراء اعلیٰ کے صوابدیدی اختیار پر تحلیل نہیں ہوئی بلکہ عمران خان نے اعتراف کیا کہ دونوں اسمبلیاں جنرل ریٹائر قمر جاوید باجوہ کے کہنے پر توڑی ہیں۔

میڈیا رپورٹ کے مطابق پاکستان عوامی لیگ کے چیئرمین ناصر محمود نے سپریم کورٹ میں درخواست دائر کرتے ہوئے پنجاب اور خیبرپختونخواہ کی اسمبلیاں بحال کی جائیں،اگر آئین کے مطابق انتخابات کرانا لازم ہیں تو 21 ارب روپے عمران خان سے لیے جائیں،پنجاب اور خیبرپختونخوا کی اسمبلیاں غیر قانونی طریقے سے تحلیل ہوئیں،گزشتہ روز عمران خان نے بیان دیا کہ اسمبلیاں جنرل ریٹائرڈ قمر جاوید باجوہ کے کہنے پر تحلیل کیں،

غیر متعلقہ شخص کے کہنے پر اسمبلیاں تحلیل نہیں ہوسکتی جبکہ موجودہ صورتحال میں ملکی معاشی حالت انتخابات کیلئے موزوں نہیں ہے،پنجاب اور خیبرپختونخوا کے عوام نے 5 سال کیلئے نمائندے منتخب کیے تھے،انتخابات اگر ہر صورت کرانے ہیں تو انتخابات کے اخراجات عمران خان خود ادا کرے، درخواست میں صدر، وفاقی حکومت،وزیر اعظم اور اسپیکر قومی اسمبلی، الیکشن کمیشن، عمران خان،حکومتی اتحادی جماعتوں سمیت دیگر کو فریق بنایا گیا ہے۔