نئی دہلی (این این آئی)بھارت میں چونکا دینے والا واقعہ سامنے آیا ہے جہاں 70سالہ خاتون کو بینک سے پنشن وصول کرنے کیلئے کئی کلومیٹر تک ننگے پائوں چلنا پڑا۔بھارتی ریاست آڈیشا سے ایک ویڈیو سوشل میڈیا پر وائرل ہو رہی ہے جس میں ایک ضعیف خاتون کو ٹوٹی ہوئی کرسی کا سہارا لے کر شدید گرمی میں ننگے پائوں چلتے ہوئے دیکھا جا سکتا ہے۔

بھارتی میڈیا رپورٹس کے مطابق بزرگ خاتون سوریا ہریجن بہت غریب ہے، اس کا بڑا بیٹا دوسری ریاست میں مزدوری کرتا ہے جبکہ وہ اپنے چھوٹے بیٹے کے خاندان کے ساتھ رہ رہی ہے۔سوریا ہریجن کا چھوٹا بیٹا بھی پیٹ پالنے کے لیے لوگوں کے مویشی چراتا ہے، اس خاندان کے پاس نہ زمین ہے نہ گھر، سوریا ہریجن اپنے چھوٹے بیٹے کے ساتھ ایک جھونپڑی میں رہتی ہے۔

میڈیا رپورٹس کے مطابق اس سے قبل جب ضعیف خاتون پنشن لینے بینک گئی تو اس کا انگوٹھا ریکارڈ سے مل نہیں رہا تھا، ایسے میں خاتون بغیر پنشن لئے گھر واپس آنے پر مجبور ہوگئیں۔اس واقعے پر سٹیٹ بینک آف انڈیا کے مینیجر نے ردِ عمل دیتے ہوئے کہا کہ خاتون کو اپنی ٹوٹی ہوئی انگلیوں کی وجہ سے رقم نکلوانے میں پریشانی کا سامنا ہے، بینک اس مسئلے کو حل کرنے کے لیے کام کر رہا ہے۔