لاہور(این این آئی) ورلڈکپ میں کچھ دن باقی ہیں تاہم قومی کرکٹ ٹیم میں تجربات کا سلسلہ نہ رک سکا ، ٹی ٹونٹی میچ میں دو نئے کھلاڑیوں کو ڈیبو کرایا گیاجو کارکردگی دکھانے میں ناکام رہے۔تفصیلات کے مطابق کرکٹ کے عالمی کپ سے قبل کھیلی جانے والی سیریز میں محمد عامر کے پاس

خود کو منوانے کیلئے آخری موقع دینے کا فیصلہ کیا گیا مگر اس کے باوجود بھی انہیں نہیں کھلایا گیا۔سپورٹس تجزیہ کاروں کے مطابق ورلڈکپ میں چند دن باقی ہیں مگر ٹیم مینجمنٹ فائنل الیون بنانے میں ہی ناکام نظر آرہی ہے۔ورلڈکپ اسکواڈ میں محمد عامر کو شامل نہ کرنے کی وجہ یہ بتائی گئی تھی کہ ان کی کارکردگی کا جائزہ انگلینڈ ٹور میں لیا جائیگا مگر انگلش ٹیم کے ساتھ کھیلے گئے واحد ٹی ٹوئنٹی میں وہ ڈریسنگ روم سے ہی میچ دیکھتے رہے۔محمد عامر کی جگہ محمد حسنین کو فائنل الیون کا حصہ بنایا گیامگر وہ وکٹ لینے میں ناکام رہے۔ محمد حسنین نے چار اوورز میں 29 رنز دیئے،دوسری طرف بلے باز اپنا پہلا ٹی ٹوئنٹی کھیلنے والے امام الحق بھی صرف سات رنز ہی بنا سکے۔تجزیہ کاروں کے مطابق خود کپتان سرفراز احمد کو ہی معلوم نہیں کہ انہیں کونسی پوزیشن پر بیٹنگ کیلئے آنا ہے،گزشتہ روز کھیلے گئے میچ میں وہ آٹھویں نمبر تک بھی بیٹنگ کیلئے نہیں آئے۔یاد رہے گزشتہ روز کھیلے گئے سیریز کے واحد ٹی 20 میچ میں انگلینڈ نے سات وکٹوں سے پاکستان کو شکست دے دی تھی،پاکستان نے انگلینڈ کے خلاف واحد ٹی20 میچ میں پہلے بیٹنگ کرتے ہوئے حریف ٹیم کو جیت کیلئے 174 رنز کا ہدف دیا تھا،پاکستان نے ٹاس جیت پر پہلے بلے بازی کا فیصلہ کیا تھا۔ قومی ٹیم کی طرف سے بابر اعظم 65 اور حارث سہیل 50 اسکور بنا کر نمایاں رہے۔