لندن(این این آئی)انگلینڈ کرکٹ بورڈ نے کہاہے کہ انگلش آل راؤنڈر بین اسٹوکس تاحکم ثانی بین الاقوامی کرکٹ میں سلیکشن کے لیے زیر غور نہیں آئیں گے۔آل راؤنڈر کو ویسٹ انڈیز کے خلاف تیسرے ایک روزہ میچ کے بعد برسٹل میں پیش آنے والے ایک واقعے کی وجہ سے گرفتار کرلیا گیا تھا۔بورڈ کے اعلامیے کے مطابق بین اسٹوک کے ساتھی کھلاڑی ایلکس ہیلز کو بھی تاحکم ثانی ٹیم میں منتخب نہیں کیا جائے گا۔بین اسٹوک کو تیسرے ایک روزہ میچ کے بعد جھگڑا کرنے پر پولیس نے گرفتار کیا
اور رات حوالات میں گزارنے کے بعد انہیں بغیر کسی الزام کے چھوڑ دیا گیا۔مذکورہ واقعہ اتوار کو ویسٹ انڈیز اور انگلینڈ کے درمیان کھیلے گئے تیسرے میچ کے بعد پیش آیا تاہم یہ پہلا موقع نہیں ہے 2012 میں بھی انہیں دیر تک باہر رہنے پر گرفتار کیا گیا اور پولیس کی جانب سے وارننگ بھی ملی جب کہ 2013 میں دیر تک شراب نوشی کی وجہ سے انہیں انگلینڈ لائنز کے دورے سے واپس گھر بھیج دیا گیا۔2014 بین اسٹوک نے غصے میں تالے پر مکا مار کر اپنا ہاتھ بھی توڑ دیا تھا جس کی وجہ سے وہ ورلڈ ٹی 20 سے دستبردار ہو گئے تھے۔
