اسلام آباد (این این آئی) پاکستان تحریک انصاف کے رہنماء حماد اظہر نے کہا ہے کہ اپریل میں روس سے سستا تیل خریدنے کا فیصلہ کرلیا تھا، چالیس روز میں پاکستان کا روپیہ 20روپے کمزور ہوا ہے ،وجہ ان کی نالائقی ہے، بجلی کی قلت کا سبب حکومت کی ناقص کارکردگی ہے،

لوڈشیڈنگ سے معیشت کو ہر گھنٹے اربوں روپوں کا نقصان ہورہا ہے۔اسلام آباد میں سابق وفاقی وزیر خزانہ شوکت ترین کے ہمراہ پریس کانفرنس کرتے ہوئے حماد اظہر نے کہاکہ پندرہ مارچ کے درمیان روس سے سستا تیل خریدنے کی آفرآئی،ہم نے اپریل میں روس سستا پیٹرول خریدنے کا فیصلہ کر لیا تھا اور پیٹرولیم مصنوعات سمیت معاشی حالات میں بہتری لانے کا جامع پلان بھی بنا دیا تھا، ہم نے پلاننگ کی ہوئی تھی کہ روس سے سستا تیل خریدیں گے ایسا نہیں تھا کہ ساٹھ روپے بڑھا کر عوام پر ایٹم بم پھینک دیں۔حماد اظہر نے کہا کہ آج جو کارٹون حکومت میں ہیں انہیں معلوم نہیں پی ایس او نے اپریل اور مئی میں پیٹرول خریدا، مفتاح اسماعیل کو علم ہی نہیں کہ روس پر کوئی پابندی نہیں۔انہوں نے کہا کہ چالیس روز میں پاکستان کا روپیہ 20روپے کمزور ہوا ہے جس کی واحد وجہ ان کی نالائقی ہے، بجلی کی کمی کے سبب پاکستان میں اسٹیل کی صنعت کو بند کر دیا گیا ہے، سی پیک کے پاور پلانٹ اس وقت صرف 25فیصد تک کام کر رہے ہیں۔پی ٹی آئی رہنما نے کہا کہ بجلی کی قلت کا سبب اس حکومت کی ناقص کارکردگی ہے، لوڈشیڈنگ سے معیشت کو ہر گھنٹے اربوں روپوں کا نقصان ہورہا ہے۔

موضوعات:حماد اظہر