اسلام آباد (این این آئی)متحدہ اپوزیشن نے کہاہے کہ عمران نیازی نے ملک اور آئین کے خلاف کھلی بغاوت(Coup) کی ہے جس کی سزا آئین کے آرٹیکل 6 میں درج ہے، سپریم کورٹ کے چیف جسٹس کی جانب سے صورتحال کا نوٹس لینے کا اقدام قابل تحسین ہے ،امید ہے پاکستان کی اعلیٰ عدلیہ آئین کے ساتھ کھڑی ہوگی ، آئین شکنی کے اقدامات سے پیدا ہونے والے بحران پر ایک منصفانہ،

عادلانہ اور دستور کی روشنی میں فیصلہ صادر فرمائیگی، آئین شکنی اور قومی اسمبلی کے اجلاس میں تحریک عدم اعتماد پرغیرقانونی وغیردستوری حکومتی اقدامات پر سماعت عدالت عظمی کا فل کورٹ سنے۔اتوار کو جاری مشترکہ اعلامیہ کے مطابق متحدہ اپوزیشن نے کہا کہ عمران نیازی نے ملک اور آئین کے خلاف کھلی بغاوت(Coup) کی ہے جس کی سزا آئین کے آرٹیکل 6 میں درج ہے۔ انہوںنے کہاکہ عمران نیازی کی اس بغاوت کی جتنی مذمت کی جائے کم ہے۔انہوںنے کہاک ملک کی تاریخ کاسیاہ ترین دن ہے جس میں آئین، جمہوریت ، قانون اور سیاسی اخلاقیات کے خلاف بغاوت کی گئی ہے۔ متحدہ اپوزیشن نے کہا کہ سپیکر سمیت تمام حکومتی ٹولے کے غیرآئینی وغیرپارلیمانی اقدامات اور رویوں کی شدید مذمت کرتے ہیں اور انہیں آئین شکن قرار دیتے ہیں۔ بیان میں کہاگیا کہ ایوان کے اندر متحدہ اپوزیشن اپنی واضح اکثریت ثابت کرچکی ہے جبکہ یہ بھی بلاشک وشبہ عیاں ہوچکا ہے کہ اپوزیشن کے پاس ایوان کے ارکان کی واضح اکثریت ہے۔ اعلامیہ میں کہاگیاکہ متحدہ اپوزیشن آئین ، عوام اور جمہوریت کا ساتھ دینے والے تمام باضمیر اور آئین وعوام دوست ارکان کا شکریہ ادا کرتی ہے،ان کے جذبے کو خراج تحسین پیش کرتی ہے۔ بیان میں کہاگیا کہ سپریم کورٹ کے چیف جسٹس کی جانب سے صورتحال کا نوٹس لینے کے اقدام کی تحسین کرتے ہیں۔

انہوں نے کہاکہ ملک وقوم کو درپیش سنگین آئینی بحران کے پیش نظر چیف جسٹس اور ان کے برادر ججز کی طرف سے فوری کارروائی اور مختصر حکم کے اجراء کا خیرمقدم کرتے ہوئے متحدہ اپوزیشن اور پاکستان کے بائیس کروڑ عوام پرامید ہیں کہ پاکستان کی اعلی عدلیہ آئین کے ساتھ کھڑی ہوگی اور آئین شکنی کے اقدامات سے پیدا ہونے والے بحران پر ایک منصفانہ، عادلانہ اور دستور کی روشنی میں فیصلہ صادر فرمائے گی۔ متحدہ اپوزیشن نے مطالبہ کیا کہ آئین شکنی اور آج کے قومی اسمبلی کے اجلاس میں تحریک عدم اعتماد پرغیرقانونی وغیردستوری حکومتی اقدامات پر سماعت عدالت عظمی کا فل کورٹ سْنے۔

موضوعات:متحدہ اپوزیشن