سان فرانسسکو(مانیٹرنگ ڈیسک) سماجی رابطے کی سب سے بڑی ویب سائٹ فیس بک نے میسنجر ایپ میں نئی تبدیلیاں متعارف کرادیں۔ تفصیلات کے مطابق فیس بک نے گزشتہ برس مئی میں اعلان کیا تھا کہ صارفین کے لیے موبائل میسنجر ایپ میں تبدیلی کی جائے گی۔
جسے آزمائشی طور پر اکتوبر میں متعارف کرادیا گیا تھا۔ ایک روز قبل فیس بک نے میسنجر ایپ کو اپ ڈیٹ کردیا جس کے بعد تمام صارفین اب آسان میسنجر استعمال کرسکیں گے۔ فیس بک نے میسنجر میں صرف تین ٹیبز شامل کیے جبکہ پہلے یہ 9 تھے، یعنی اب صارفین کے لیے ایپ مزید آسان ہوگئی۔ گزشتہ برس ٹیکنالوجی پر نظر رکھنے والی صحافی جین مین چن وانگ نے سماجی رابطے کی ویب سائٹ پر دو علیحدہ علیحدہ تصاویر ٹویٹ کرتے ہوئے بتایا تھا کہ فیس بک نے مسینجر ایپ میں کی جانے والی متوقع تبدیلیوں کو آزمائشی طور پر متعارف کرادیا۔ فیس بک کی آزمائشی سروس مخصوص صارفین کے لیے تھی، البتہ اب اس سے عام صارفین بھی استفادہ کرسکیں گے۔ فیس بک نے میسنجر میں تین ٹیب شامل کیے جن میں فلٹر آپشن دیا گیا، نئے ورژن کے تحت صارف جن لوگوں سے چیٹ کرنا چاہیے گا وہ ہی اُسے پیغام بھیج سکیں گے جبکہ اُس کی مرضی کے بغیر کوئی بھی میسج نہیں بھیج سکے گا۔ فیس بک کے دوستوں کے دوست، جن دوستوں نے موبائل نمبر سے فیس بک آئی ڈی بنائی ہے، جو لوگ آپ کو انسٹاگرام پر فالو کرتے ہیں یا دیگر صارفین سب کو پیغام بھیجنے کے لیے اجازت درکار ہو گی۔ گزشتہ برس فیس بک کے نائب صدر اسٹان نے تبدیلی کا عندیہ دیتے ہوئے کہا تھا کہ ’کئی برسوں میں ہماری ٹیم نے میسنجر کے حوالے سے کافی مہارت حاصل کرلی، ایپ میں تبدیلیاں آسان نہیں تھیں البتہ اب ایسا ممکن ہے‘۔ یاد رہے کہ فیس بک نے صارفین کی شکایات کو مدنظر رکھتے ہوئے مسینجر سے بھیجے جانے والے پیغام کو واپس لینے کے فیچر پر بھی کام شروع کردیا ہے۔ دوسری جانب ماہرین کا یہ بھی ماننا ہے کہ فیس بک میسنجر کا ڈارک موڈ فیچر سمیت دیگر سہولیات بھی متعارف کرانے کا ارادہ رکھتی ہے تاکہ گرتی ہوئی ساکھ کو بحال رکھا جاسکے۔
