اسلام آباد(نیوز ڈیسک) ملک میں ایندھن کی بچت اور پٹرولیم مصنوعات کے بہتر استعمال کے لیے دفاتر اور تعلیمی اداروں کے کام کے دن کم کرنے کی تجویز تیار کر لی گئی ہے۔
اس منصوبے کا مقصد پٹرولیم مصنوعات کی طلب میں کمی لانا اور دستیاب ذخائر کو مؤثر انداز میں استعمال کرنا ہے۔تفصیلات کے مطابق وزیراعظم شہباز شریف کی سربراہی میں پٹرولیم مصنوعات کے ذخائر اور ان کی کھپت کا جائزہ لینے کے لیے ہائی پاور کمیٹی کا اجلاس منعقد ہوا، جس میں وزیر خزانہ محمد اورنگزیب نے شرکاء کو تفصیلی بریفنگ دی۔اجلاس میں بتایا گیا کہ سرکاری و نجی دفاتر، تعلیمی اداروں اور خدمات فراہم کرنے والے شعبوں کے لیے کام کے دن کم کرنے کا منصوبہ تیار کیا گیا ہے۔ اس کے ساتھ تعلیمی اداروں میں آن لائن یا ورچوئل تعلیم کا نظام متعارف کرانے اور دفاتر میں ورک فرام ہوم کی سہولت دینے کی تجاویز بھی زیر غور ہیں۔
حکام کے مطابق ان اقدامات سے ایندھن کے استعمال میں کمی آئے گی اور پٹرولیم مصنوعات کے ذخائر کو بہتر طریقے سے استعمال کیا جا سکے گا۔اس کے علاوہ اجلاس میں پٹرولیم مصنوعات کی قیمتوں کا ہفتہ وار جائزہ لے کر ان میں ردوبدل کرنے کی تجویز بھی پیش کی گئی۔ ذخیرہ اندوزی اور اسمگلنگ کے خاتمے کے لیے سخت کارروائی کرنے کا بھی فیصلہ کیا گیا۔اجلاس کے دوران یہ بھی بتایا گیا کہ وزیراعظم شہباز شریف آج اس حوالے سے چند اہم فیصلوں کا اعلان کر سکتے ہیں۔
