اسلام آباد(نیوز ڈیسک)سعودی عرب نے عیدالفطر کے موقع پر نجی اور غیر منافع بخش شعبے کے ملازمین کے لیے چار روزہ تعطیلات کا اعلان کر دیا ہے،

جبکہ پاکستان میں عیدالفطر کے سلسلے میں تین دن کی سرکاری چھٹیوں کا امکان ظاہر کیا جا رہا ہے۔عرب میڈیا کے مطابق سعودی وزارت افرادی قوت نے نجی اور غیر منافع بخش اداروں کے لیے عیدالفطر کی تعطیلات کی تفصیلات جاری کر دی ہیں۔ وزارت کے ترجمان محمد الرزقی نے بتایا کہ ان اداروں میں ملازمین کو چار دن کی چھٹیاں دی جائیں گی۔ان کے مطابق تعطیلات کا آغاز بدھ 18 مارچ (29 رمضان) کو دفتری اوقات کے اختتام پر ہوگا اور یہ وقفہ چار روز تک جاری رہے گا۔دوسری جانب پاکستان میں محکمہ موسمیات نے عیدالفطر کے چاند کے حوالے سے پیشگوئی جاری کرتے ہوئے امکان ظاہر کیا ہے کہ ملک میں عیدالفطر 21 مارچ 2026 بروز ہفتہ منائی جا سکتی ہے۔

ادھر کابینہ ڈویژن کی جانب سے سال 2026 کی سرکاری اور اختیاری تعطیلات کا نوٹیفکیشن بھی جاری کر دیا گیا ہے، جس کے مطابق پاکستان میں عیدالفطر کے لیے 21، 22 اور 23 مارچ کو تین روزہ سرکاری چھٹیاں متوقع ہیں۔