وزیراعظم محمد شہباز شریف نے صوبائی حکومتوں کو ہدایت کی ہے کہ پٹرولیم مصنوعات کی ذخیرہ اندوزی میں ملوث عناصر کے خلاف فوری اور سخت قانونی اقدامات کیے جائیں۔
جمعہ کے روز وزیراعظم کی زیر صدارت پٹرولیم مصنوعات سے متعلق ایک اعلیٰ سطح کا اجلاس منعقد ہوا۔ وزیراعظم آفس کے میڈیا ونگ کی جانب سے جاری بیان کے مطابق اجلاس میں نائب وزیراعظم و وزیر خارجہ محمد اسحاق ڈار، وفاقی وزیر جام کمال خان اور دیگر اعلیٰ سرکاری حکام نے شرکت کی۔اجلاس کے دوران وزارتِ پٹرولیم نے خطے میں موجودہ صورتحال کے تناظر میں ملک میں پٹرولیم مصنوعات کے ذخائر سے متعلق تفصیلی بریفنگ دی۔ حکام نے بتایا کہ قومی ضروریات کو پورا کرنے کے لیے ملک میں پٹرولیم مصنوعات کا وافر ذخیرہ موجود ہے۔وزیراعظم نے صوبائی انتظامیہ کو ہدایت کی کہ جو عناصر پٹرولیم مصنوعات کی مصنوعی قلت پیدا کرنے یا ذخیرہ اندوزی میں ملوث پائے جائیں، ان کے خلاف سخت کارروائی کی جائے۔ انہوں نے کہا کہ ایسے پٹرول پمپس کو فوری طور پر سیل کیا جائے، ان کے لائسنس منسوخ کیے جائیں اور ذمہ دار افراد کے خلاف قانونی کارروائی عمل میں لائی جائے۔
شہباز شریف نے وفاقی وزیر پٹرولیم کو بھی ہدایت دی کہ وہ مختلف صوبوں کا دورہ کریں اور صوبائی حکومتوں کے ساتھ مل کر پٹرولیم مصنوعات کی بچت اور عوام کو بلا تعطل فراہمی کے لیے جامع حکمت عملی تیار کریں۔اس کے علاوہ وزیراعظم نے پٹرولیم مصنوعات کی ترسیل اور نقل و حرکت کی مؤثر نگرانی کے لیے ایک ڈیجیٹل ڈیش بورڈ بنانے کی ہدایت بھی دی، جس کے ذریعے صوبوں کے ساتھ حقیقی وقت میں معلومات کا تبادلہ کیا جا سکے گا۔
