اسلام آباد (این این آئی) اسلام آباد ہائیکورٹ کے حکم کے باجود وائس چیئرمین پی ٹی آئی شاہ محمود قریشی کی اڈیالہ جیل سے تاحال رہائی نہ ہوسکی۔وکیل بیرسٹرتیمور ملک نے کہا ہے کہ شاہ محمود کی رہائی کا حکم نامہ تحریری یقین دہانی سے مشروط تھا، شاہ محمود قریشی کو عدالتی حکم نامے اور شرائط سے آگاہ کیا تھا تاہم شاہ محمود قریشی نے اب تک تحریری یقین دہانی عدالت کو جمع نہیں کرائی۔
بیرسٹرتیمور ملک نے کہا کہ شاہ محمود ایسا کوئی حلف نامہ نہیں دینا چاہتے جس سے ان کے سیاسی وجمہوری حقوق متاثرہوں۔بیرسٹر تیمور ملک سمیت وکلاء ٹیم شاہ محمود قریشی سے اڈیالہ جیل میں دوبارہ ملے گی، شاہ محمود قریشی کو ملاقات میں عدالت کے موقف سے آگاہ کیا جائے گا،رہائی کی شرائط پر دوبارہ بات ہوگی۔ شاہ محمود قریشی نے اپنے وکیل بیرسٹر تیمور ملک کو کہا ہے کہ عدالتوں کا بہت احترام ہے، تاہم پر امن احتجاج سیاسی جماعتوں کا جمہوری حق ہے۔
