اسلام آباد(مانیٹرنگ ڈیسک) پاکستان تحریک انصاف کے رضا کاروں پر مشتمل کورونا وائرس ریلیف ٹائیگر فورس جو حکمراں جماعت نے گزشتہ سال متعارف کرائی تھی ، اس کے پلے کوئی کام نہیں اور وہ عضو معطل بن کر رہ گئی ہے ، اسے ابھی تک قومی سطح کی کوئی ذمہ داری
نہیں سونپی گئی ہے ۔ روزنامہ جنگ میں طارق بٹ کی شائع خبر کے مطابق اس بات کی توثیق وزیر اعظم کے خصوصی معاون عثمان ڈار نے بھی کی ہے ۔ رابطہ کر نے پر انہوں نے کہا کہ ان رضاکاروں نے اپنے علاقائی ڈپٹی کمشنرز اور اسسٹنٹ کمشنرز سے قریبی رابطہ رکھا ہوا ہے ۔ عثمان ڈار کے مطابق موسم بہتر ہو تے ہی ٹائیگر فورس کومختلف سرگرمیوں کے لئے استعمال کیا جائے گا۔ٹائیگر فورس کے قیام پر تحریک انصاف کو اپنے سیاسی حریفوں کی جانب سے سخت تنقید کا سامنا کرنا پڑا ۔ کوئی مثبت تعمیری کام کر نے کے بجائے ٹائیگر فورس کے رضاکار مختلف علاقائی تنازعات میں الجھ کر رہ گئے ۔ اس ٹائیگر فورس کا کام دنیا میںپھیلی وبا سے نمٹنے میں حکام کی مدد اور ایس او پیز پر عمل درآمد کرانا ہے ۔لیکن ان کے کام کی وضاحت نہیں۔
