لاہور(این این آئی)کاشانہ ویلفیئر ہوم کی سابقہ سپرنٹنڈنٹ افشاں لطیف نے کہا ہے کہ عدالتی جنگ اپنی نوکری کیلئے نہیں بلکہ یتیم بچیوں کو استحصال سے بچانے اورجبری شادیوں سے بچانے کیلئے ہے،جب تک شفاف انکوائری نہیں ہوتی،حقائق سامنے نہیں آتے اور مجرموں کو سزا نہیں ملتی میں کوئی دوسرا عہدہ بھی قبول نہیں کروں گی۔ اپنے ویڈیو بیان میں انہوں نے کہا کہ کاشانہ میں جو بھی صورتحال ہوئی

اس معاملے پر راجہ بشارت اور اجمل چیمہ کی جانب سے مجھ پر تین الزامات لگائے جارہے ہیں،یہ کہاگیا کہ میں نے کرپشن کی ہے حالانکہ 16اگست سے پہلے مجھ پر نہ تو کوئی کرپشن کا الزام تھا اورنہ ہوئی کوئی انکوائری ہوئی۔ میرا ان سے سوال ہے کہ میرے خلا ف پوری حکومتی مشینری سرگرم ہے اگر ایسی کوئی انکوائری ہوئی تھی یا کرپشن کا الزام تھا تو اس کا تحریری یا کوئی زبانی ثبوت ہی لے آئیں۔ مجھ پر دوسرا الزام شادی کا لگایا گیا جس پر میرا ان سب سے بڑی معذرت کے ساتھ سوال ہے کہ شادی تو خاتون اول بشریٰ بی بی نے بھی عمران خان صاحب سے کی ہے، یہاں بات جبری شادیوں کی ہو رہی ہے او ریہ الزام شرعی شادیوں پر لگا رہے ہیں۔پھر کہا گیا کہ یہ ٹرانسفر پوسٹنگ کامعاملہ تھا لیکن پوری دنیا میں ایسی کوئی مثال نہیں ملتی کہ کسی سرکاری افسر کیخلاف ادارے میں پولیس بلائی جائے اورداخلی دروازہ توڑ دیا جائے اور سرکار ی افسر کو گرفتار کر لیا جائے۔یہ مسئلہ ٹرانسفرپوسٹنگ کا نہیں تھا بلکہ یہ مسئلہ یتیم بچیوں کو استحصال او رجبری شادیوں سے محفوظ رکھنے کا تھا جس پر میں نے اپنی آواز اٹھائی۔افشاں لطیف نے کہا کہ عدالتی جنگ قطعی اپنی نوکری کیلئے نہیں بلکہ یتیم بچیوں کے حقوق کیلئے ہے بلکہ ایسے اداروں میں باقی جتنے بچے ہیں جو استحصال کا شکار ہوتے ہیں ان کیلئے ہے اور جب تک عدالتی تحقیقات مکمل نہیں ہوتیں، حقائق سامنے نہیں آتے اورمجرموں کو سزا نہیں دی جاتی نوکری تو کیا میں کوئی دوسرا عہدہ بھی نہیں لوں گی۔