اسلام آباد(نیوز ڈیسک) معروف گلوکار جواد احمد نے اپنے ایک ویڈیو بیان میں کہا کہ برطانیہ سے شاہی جوڑا پاکستان آیا ہوا ہے، میں بہت عجیب محسوس کر رہا ہوں کیونکہ میں دیکھ رہا ہوں کہ سوشل میڈیا پر لوگ ان کی تصویریں ادھر سے ادھر بھیج رہے ہیں اور خوش ہیں، میں سمجھتا ہوں کہ ان کو پتہ ہونا چاہیے کہ یہ لوگ کون ہیں، میں ان کی بھی عزت کرتا ہوں میں سب کی عزت کرتا ہوں، تمام انسانوں کی عزت کرتا ہوں لیکن یہ شاہی خاندان وہی خاندان ہے
جس نے ہمارے اس خطے کو اپنا تختہ مشق بنایا ہمارا خون پسینہ نچوڑ لیا، ہم غربت کی اتھاہ گہرائیوں میں چلے گئے صرف اس خاندان کی وجہ سے انہوں نے اپنی مملکتیں بنائیں، ان کی ٹیکسٹائل انڈسٹریوں کو ہم نے اپنے خون سے تعمیر کیا اور یہ لوگ ہم پر حکومت کرتے رہے اور ہم پر بہت زیادہ مظالم کئے، یہ خاندان اس میں ملوث تھا، جواد احمد نے کہا کہ میں نہیں کہتا کہ آپ ان لوگوں کو عزت نہ دیں آپ تمام لوگوں کو عزت دیں اور ان کو بھی دیں لیکن اتنی عزت نہ دیں کہ آپ خود چھوٹے لگنے شروع ہو جائیں، جواد احمد نے کہاکہ یہ جو عمران خان ہیں یہ تو ویسے ہی مرعوب ہیں ان لوگوں سے، شاہی خاندان سے ان کے تعلقات رہے ہیں، ان کا پتہ نہیں کیا مسئلہ ہے کہ اگر ان کی نجی زندگی بھی دیکھیں تو اس کا تعلق برطانیہ کے ساتھ ہے آج بھی ان کے بچے وہاں رہتے ہیں، عمران خان شاہی خاندان سے تعلقات کے بارے بہت شوق سے بتاتے ہیں، لیڈی ڈیانا بھی شوکت خانم ہسپتال کے لئے آئی تھیں، جواد احمد نے کہا کہ یہ کہتے ہیں کہ آصف علی زرداری اور نواز شریف کوئی بادشاہ ہیں خود بادشاہوں کے ساتھ پھر کر بڑا ہی اچھا محسوس کرتے ہیں اور میں ایک نیشنلسٹ ہوں میں بین الاقوامی پسند ہوں، میں سمجھتا ہوں کہ دنیا کے لوگوں کو خوشحالی ملنی چاہیے، تمام مذاہب، فرقوں اور لوگوں کو خوشحالی ملنی چاہیے، ہم یہ چاہتے ہیں کہ دنیا کے تمام لوگ خوش و خوشحال رہیں، اس قوم کا کمپلیکس جو انگلستان اور شاہی خاندان کے ساتھ ہے اس کو آخر کہاں تک لے کر جائیں گے۔ یہ ہمارے لیے ایک سوالیہ نشان ہے۔
