لاہور(این این آئی) جمعیت علمائے اسلام(ف) کی جانب سے حکومت کیخلاف اعلان کردہ تحریک کیلئے پیشرفت جاری ہے اور اسی تناظر میں مولانا فضل الرحمان نے ایک ہفتے میں دوسری بار مسلم لیگ (ن) کے صدر محمد شہباز شریف سے وفود کی سطح پر ملاقات کی ہے۔ ماڈل ٹاؤن لاہور میں ہونے والی ملاقات میں ملک کی مجموعی سیاسی صورتحال، جے یو آئی کے اسلام آباد کی طرف مار چ، مہنگائی،مسئلہ کشمیر اور اپوزیشن رہنماؤں پر کیسز پر
تبادلہ خیال اور آئندہ کے حوالے سے حکمت عملی زیر غور آئی۔ ماڈل ٹاؤن میں ہونے والی ملاقات میں جے یو آئی (ف) کی جانب سے مولانا عبد الغفور حیدری، مولانا امجد خان اور مفتی ابرار احمد جبکہ مسلم لیگ(ن) کی جانب سے احسن اقبال، سردار ایاز صادق، رانا تنویر حسین اور مریم اورنگزیب سمیت دیگر شریک ہوئے۔ذرائع کے مطابق ملاقات میں اتفاق کیا گیا ہے کہ آزادی مارچ کے سلسلہ میں تمام اپوزیشن جماعتوں سے رابطے کئے جائیں گے۔
