اسلام آباد (مانیٹرنگ ڈیسک) پاکستان تحریک انصاف کی جانب سے انتخابات 2018کیلئے امیدواروں کی انتخابی فہرست کئی مرتبہ ردوبدل کے بعد دو تین بار جاری کی جا چکی ہے ۔ ٹکٹوں کی تقسیم پر پی ٹی آئی میں احتجاج کا سلسلہ بھی جاری ہے اور اب نیا تنازعہ سامنے آگیا ہے۔ تحریک انصاف کی جانب سے جاری انتخابی امیدواروں کی حتمی فہرست میں پی پی 120 فیصل آباد میں صوبائی اسمبلی کا ٹکٹ 2 امیدواروں کو جاری

کردیا گیا ہے۔ تحریک انصاف نے فیصل آباد کے اس حلقے سے محمد رمضان اور خاوراحمد کو ٹکٹ جاری کر دیا ہے جس پر دونوں انتخابی امیدوار حیران و پریشان ہیں اور الیکشن کون لڑیگا اس خیال سے شش و پنج میں مبتلا ہیں جس کی وجہ سے نہ صرف ان کی انتخابی مہم متاثر ہو رہی ہے بلکہ ووٹر اور سپورٹر دونوں تقسیم ہو چکے ہیں۔ واضح رہے کہ اس سے قبل تحریک انصاف کی انتخابی فہرست میں کئی غلطیاں سامنے آچکی ہیں۔

موضوعات:انتخابات 2018 انتخابی فہرست پاکستان تحریک انصاف پی پی 120 خاوراحمد محمد رمضان