اسلام آباد(مانیٹرنگ ڈیسک)بانی ایم کیو ایم الطاف حسین نے اپنے قریبی ساتھیوں کو خود مروایا، سلیم شہزاد کی کراچی آمد 2018کے عام انتخابات کی تیاریوں کیلئے ہے، ایم کیو پاکستان اور لندن آپسی رابطے میں ہیں، فنگشنل لیگ ایم کیو ایم کے ساتھ اتحاد کی خواہاں ہے، عزیر بلوچ کی خواہش پر لیاری میں ایس ایچ او تعینات اور پیپلزپارٹی کے انتخابی ٹکٹ دئیے جاتے تھے ،

نبیل گبول کا نجی ٹی وی پروگرام میں اظہار خیال۔ تفصیلات کے مطابق پیپلزپارٹی سے سابق رہنما سردار نبیل گبول نے نجی ٹی وی کے پروگرام میں گفتگو کرتے ہوئے کہا ہے کہ الطاف حسین کا سیاسی باب بند ہو چکا ہے اب انہیں کبھی ماضی کی طرح بڑی تعداد میں ووٹ نہیں ملیں گے، بانی ایم کیو ایم نے اپنے قریبی ساتھیوں کو خود مروایا، فاروق ستار اور سلیم شہزاد اب تک بچے ہوئے ہیں۔ کراچی میں نووارد سلیم شہزاد سے متعلق گفتگو کرتے ہوئے ان کا کہنا تھا کہ الطاف حسین نے انہیں 2018کے عام انتخابات کی تیاریوں کے سلسلے میں پاکستان بھیجا ہے، ایم کیو ایم پاکستان اور لندن آپس میں رابطے میں ہیں۔فنگشنل لیگ سے متعلق انکشاف کرتے ہوئے نبیل گبول نے کہا کہ پیرپگاڑا نے پرویز مشرف سے رابطہ کر کے انہیں ایم کیو ایم کیساتھ فنگشنل لیگ کے اتحاد کیلئے کردار ادا کرنے کا کہا ہے۔پیپلزپارٹی اور آصف علی زرداری بارے ان کا کہنا تھا کہ ماضی میں عزیر بلوچ کو کھلی چھوٹ دی گئی، لیاری میں عزیر بلوچ کے کہنے پر ایس ایچ او تعینات ہوتے تھے جبکہ پیپلزپارٹی اسی کو ٹکٹ دیتی تھی

جس کو عزیر بلوچ کی آشیرباد حاصل ہوتی تھی۔ پاکستان تحریک انصاف میں شمولیت سے متعلق سوال پر نبیل گبول نے کہا کہ تحریک انصاف سے رابطے میں ہوں اورتحریک انـصاف میں شمولیت میں کوئی چیز رکاوٹ نہیں ، تحریک انـصاف کراچی کے رہنما آپس میں الجھے ہوئے ہیں ان میں یہ صلاحیت نہیں کہ وہ عمران خان کے بغیر 100افراد کو بھی اکٹھا کر سکیں۔

سردار نبیل گبول نے وزیراعلیٰ سندھ مراد علی شاہ سے لیاری کے مسائل حل کرنے اور یہاں کا دورہ کرنے کا بھی کہا ۔لیاری میں امن کے حوالے سے انہوں نے تمام کریڈ ٹ رینجرز کو دیتے ہوئے کہا کہ لیاری میں اگر آج امن ہے تو وہ صرف رینجرز کی بدولت ہے۔

موضوعات:نبیل گبول