لاہور( این این آئی)یکم نومبر سے پٹرولیم مصنوعات کی قیمتوں میں اضافے کا امکان ہے ۔نجی ٹی وی کے مطابق پٹرولیم مصنوعات کی قیمتوں میں آئندہ ماہ کے لئے اضافے کی سفارش کر دی گئی ہے ۔وزارت پٹرولیم کو دی گئی سمری میں کہا گیا ہے کہ عالمی مارکیٹ میں خام تیل کی قیمت 50 ڈالر فی بیرل ہو گئی ہیں جس کی وجہ سے یکم نومبر سے مقامی طور پر بھی قیمتوں میں اضافہ ناگزیر ہے ۔ سمری کے مطابق ہائی اسپیڈ ڈیزل کی قیمت میں 6 روپے 69 پیسے فی لٹر اضافے کی سفارش کی گئی ہے۔مٹی کا تیل بھی 3 روپے 97 پیسے،لائٹ ڈیزل کی قیمت 4 روپے 47 پیسے جبکہ پٹرول کی قیمت میں سب سے کم 85 پیسے فی لٹراضافے کی سفارش کی گئی ہے ۔ پٹرولیم مصنوعات کی قیمتوں میں اضافے کی سمری وزارت پٹرولیم سے وزارت خزانہ بھیجی جائے گی جس پر وزارت خزانہ وزیر اعظم کی مشاورت سے حتمی فیصلہ کرے گی ۔