اسلام آباد (این این آئی)قومی اسمبلی اجلاس شروع ہوتے ہی غیر معینہ مدت تک ملتوی کردیا گیا،اجلاس کے اچانک ملتوی کرنے پر اپوزیشن نے احتجاج کیا ، ،اجلاس غیرمعینہ مدت تک ملتوی کرکے جلد ہی وزیر اعظم کے اعتماد کے لئے بلایا جائیگا۔جمعرات کو قومی اسمبلی اجلاس

ڈپٹی سپیکر قاسم سوری کی صدارت میں شروع ہوا تو تلاوت نعت اور قومی ترانہ کے بعد ڈپٹی سپیکر نے اجلاس غیر معینہ تک ملتوی کرنے کا اعلان کردیا ۔اس پر اپوزیشن نے شور شرابہ شروع کردیا کہ اچانک اجلاس کیوں ملتوی کردیا گیا ہے ۔یہ اجلاس اپوزیشن کی ریکوزیشن پر جاری تھا پی پی پی رکن آغا رفیع اللہ نے کھینچ کے رکھ تان کے رکھ بوریا بستر باندھ کے رکھ کی نعرے بازی شروع کردی تاہم ڈپٹی سپیکر کے اعلان کے باعث اجلاس غیر معینہ مدت تک ملتوی کردیاگیا۔ذرائع کے مطابق سپیکر قومی اسمبلی نے مشاورت کے بعد اجلاس ملتوی کیا ،وزیراعظم کے اعتماد کے ووٹ کیلئے نیا اجلاس بلایا جائیگا، جس کے لئے سمری وزارت پارلیمانی امور صدر مملکت کو بھیجے گی۔دریں اثنا پاکستان تحریک انصاف کے رہنماسینیٹر فیصل جاوید نے سینیٹ انتخابات میں کامیابی حاصل کرنے والے تمام امیدواروں کو مبارکباد دی ہے۔اپنے بیان میں سینیٹر فیصل جاوید نے کہاکہ سینیٹ انتخابات میں کامیابی حاصل کرنے والے تمام امیدواروں

کو مبارکباد پیش کرتا ہوں،ہمارے ان امیدواروں کی کامیابی سے تحریک انصاف سینٹ کی اکثریتی جماعت بن کر ابھری ہے۔انہوں نے کہا کہ دس کی دس نشستیں جیتنے پر خیبر پختونخوا کو خصوصی مبارکباد پیش کرتے ہیں۔انہوں نے کہاکہ اسلام آباد میں اخلاقی فتح سے کرپشن کیخلاف ہماری سوچ کو تقویت بخشی ہے۔انہوں نے کہاکہ پی ڈی ایم اسلام آباد کی نشست جیت کر بھی رسوا اور شرمسار ہوئی۔

موضوعات:قومی اسمبلی