سوات (مانیٹرنگ ڈیسک) سرحد رورل سپورٹ پروگرام کے دو پن بجلی گھروں کے کالام میں قیام کے بعد وادی کالام لوڈشیڈنگ فری بن گیا ہے جہاں عوام کو 24 گھنٹے بلا کسی تعطل بجلی فراہمی جاری ہے۔تفصیلات کے مطابق ماہ رمضان میں جہاں ملک بھر کے عوام بجلی کی ظالمانہ لوڈ شیڈنگ کی وجہ سے سراپا احتجا ج ہیں وہیں سوات کے وادی کالام میں دو پن بجلی گھروں کی تعمیر کے بعد یہ علاقہ لوڈشیڈنگ فری ہے اور جہاں صارفین انتہائی کم قیمت پر بلا کسی تعطل 24 گھنٹے بجلی کے مزے لے رہے ہیں۔

مجموعی طورپر 1600 کلوواٹس پیداوار کے حامل کالام اور اشورنگ کے پن بجلی گھروں کی تعمیر تحریک انصاف کے صوبے کے مختلف اضلاع میں سرحد رورل سپورٹ پروگرام کے تحت اعلان کردہ اُن 356 پن بجلی گھروں کی وہ کڑی ہے جس کی تعمیر کا اعلان عمران خا ن نے ملک میں جاری توانائی بحران کے پیش نظرآج سے ساڑھے تین سال قبل کیا تھا۔کالام اشورنگ پن بجلی گھروں سے اگر ایک طرف کالام کے ساڑھے چار ہزار مقامی آباد ی ، ساڑھے چار سو ہوٹلز ، دو کارخانوں اور کئی دیگر سرکاری و غیر سرکاری عمارتوں کو بجلی فراہم کی جا رہی ہے جس کی قیمت گھریلو صارفین کے لئے 3 روپے اور کمرشل صارفین کے لئے 7 روپے مقرر کی گئی ہے تو دوسرے طرف ان دو پن بجلی گھروں سے چھ سو کلوواٹس اضافی بجلی بھی حاصل کی جا رہی ہے۔

موضوعات:بجلی تحریک انصاف سوات لوڈ شیڈنگ