ریاض (نیوز ڈیسک) حج کے موقع پر سعودیہ کی حکومت حجاج کرام کو بہترین سہولیات دینے کی کوشش کرتی ہے تاکہ انہیں کسی قسم کی پریشانی نہ ہو، وہاں موجود سکیورٹی اہلکار بھی حاجیوں کی خدمت میں پیش پیش رہتے ہیں، حاجیوں کی خدمت کا ایک واقعہ سامنے آیا ہے، انسانی خدمت کا یہ بے مثال واقعہ شاید سامنے نہ آ سکتا لیکن فوٹو گرافر سعود مسیہیج الغنزی نے سکیورٹی اہلکار کی ایک بزرگ حاجی کی مدد کرتے ہوئے تصویر کھینچ لی اور صبح یہ تصویر اخبارات میں چھپ گئی

جس پر مکہ کے گورنر نے حج کی بہترین تصویر قرار دیتے ہوئے انہیں اول انعام دیا، اس تصویر میں ایک سکیورٹی اہلکار نے ایک بزرگ پاکستانی حاجی کو اٹھا رکھا ہے اور وہ انہیں اپنی منزل مقصود تک پہنچا رہا ہے، اس تصویر کے بارے میں وہ سکیورٹی اہلکار جس کا نام ماجد علی الحکمی تھا بھی لا علم تھا لیکن جب اخبارات میں تصویر چھپی تو اسے علم ہوا۔ اس کی یہ نیکی تصویر کی صورت میں دنیا کے سامنے آئی تو اس کی تعریف کے پل باندھ دیے گئے۔ سکیورٹی اہلکار ماجد نے اس حوالے سے بتایا کہ میں نے عرفات کے روز دور کھڑے ایک بوڑھے حاجی کو دیکھا جنہیں چلنے میں دُشواری کا سامنا تھا، اس نے بتایا کہ یہ بزرگ تھوڑی دیر چل کر رک جاتے تھے اور اپنے پیروں کو ملتے، اپنی سانس بحال کرتے اور دوبارہ چل پڑتے لیکن دو چار قدم چلنے کے بعد دوبارہ تھک جاتے، سکیورٹی اہلکار ماجد نے بتایا کہ یہ سب دیکھ کر میں ان کے پاس گیا اور ان سے سوال کیا کہ کیا آپ کے پاؤں زخمی ہیں، ماجد نے کہا کہ اس کے جواب میں بزرگ حاجی نے اردو میں مجھے جواب دیا لیکن میں یہ سمجھ نہ پایا، زبان نہ سمجھنے کے باوجود اتنی سمجھ آ گئی کہ بزرگ شدید تکلیف میں ہیں، میں نے انہیں پانی پلایا اور اشارہ کرتے ہوئے سمجھایا کہ آپ میرے والد جیسے ہیں، میں آپ کو آپ کی منزل تک پہنچا کر آتا ہوں، اس کے بعد میں نے بزرگ حاجی کو سہارا دے کر چلنے میں مدد دی لیکن ان کی ہمت چند قدم چلنے کے بعد دوبارہ جواب دے گئی جس پر میں نے انہیں ہاتھوں پر اٹھا لیا، پہلے انہیں مزدلفہ تک لے کر گیا اور پھر وہاں سے منیٰ میں ان کے ٹھکانے تک پہنچایا۔ ماجد نے بتایا کہ تمام راستے میں وہ اردو میں مجھ سے کچھ بولتے رہے اور دعائیں بھی دیتے رہے، ماجد نے بتایا کہ اس دوران حیران کن طور پر مجھے تھکن بھی محسوس نہیں ہوئی۔ اس طرح ماجد کے اس عمل نے سب کے دل جیت لئے۔

موضوعات:اہلکار نے دل جیت لئے