ممبئی(این این آئی) راکھی ساونت سوشل میڈیا اسٹار دیپک کلال کے ساتھ شادی کے بندھن میں بندھنے جارہی ہیں تاہم میڈیا میں ان دنوں یہ بحث جاری ہے کہ کیاراکھی ساونت کی شادی میں اداکارہ ماہرہ اورفواد خان بھی شرکت کریں گے۔بالی ووڈ میں ان دنوں شادی سیزن منایاجارہا ہے پہلے دپیکا پڈوکون اور رنویر سنگھ شادی کے بندھن میں بندھے، پھر پریانکا چوپڑا پیا دیس سدھاریں اور اب کپل شرما

اور راکھی ساونت کی باری ہے۔ راکھی ساونت متنازع سوشل میڈیا اسٹار دیپک کلال کے ساتھ 31 دسمبر کو لاس اینجلس میں شادی کے بندھن میں بندھیں گی۔بھارتی میڈیا کے مطابق راکھی ساونت نے اپنی شادی میں شاہ رخ خان اورکرن جوہر سمیت متعدد بالی ووڈ اسٹارز کو مدعو کیاہے تاہم دلچسپ بات یہ ہے کہ انہوں نے شادی میں پاکستان سے بھی مہمان بلائے ہیں۔پاکستان کے متنازع سوشل میڈیااسٹار ناصر خان جان نے چند روز قبل ایک ویڈیو انسٹاگرام پر شیئر کی تھی جس میں انہوں نے تصدیق کی تھی راکھی ساونت نے انہیں اپنی شادی میں نہ صرف مدعو کیا ہے بلکہ شادی میں شرکت کے لیے ہوائی جہاز کے ٹکٹس بھی بھجوائے ہیں اس کے ساتھ ہی انہوں نے کہا راکھی کی شادی میں پاکستان کے بڑے اسٹارز بھی شرکت کریں گے جن میں فواد خان اورماہرہ خان بھی شامل ہیں۔راکھی ساونت نے یہ ویڈیو اپنے انسٹاگرام اکاؤنٹ پر شیئر کی اور لکھا پاکستان سے پیغام آیا ہے تاہم انہوں نے اس بات کی تصدیق یا تردید نہیں کی کہ اپنی شادی میں انہوں نے پاکستانی سپر اسٹار فواد اورماہرہ خان کو بھی مدعو کیا ہے اور کیا واقعی وہ دونوں راکھی ساونت کی شادی میں شرکت کریں گے۔

موضوعات:راکھی ساونت