لیگی ممبر قومی اسمبلی کے بھائی کی گاڑی پر ڈاکوں کی فائرنگ۔اہل علاقہ نے ڈاکوں کے فرار کی کوشش ناکام بنا دی

پاکپتن(آئی این پی ) پاکستان مسلم لیگ(ن)کے ممبر قومی اسمبلی احمد رضا مانیکا کے چھوٹے بھائی کی گاڑی پر ڈاکوں کی فائرنگ، اہل علاقہ نے ڈاکوں کے فرار کی کوشش ناکام بنا دی۔ میڈیا رپورٹ کے مطابق مسلم لیگ ن کے رکن قومی اسمبلی احمد رضا مانیکا کے بھائی معظم مانیکا اپنے آبائی گاوں پیر غنی سے کام کے سلسلہ میں جا رہے تھے کہ ڈاکوں نے گاڑی نہ روکنے پر فائرنگ کر دی، ڈاکوں نے فائرنگ کے بعد فرار ہونے کی کوشش کی تو اہل علاقہ نے مساجد میں اعلانات کروا کر ان کا تعاقب شروع کر دیا۔ ڈاکو فرار ہو کر دریائے ستلج کے قریب مکئی فصل میں چھپ گئے تھے، اہل علاقہ کا ڈاکوں کے ساتھ فائرنگ کا تبادلہ ہوا جس کے بعد انہیں گھیر کر پکڑ لیا گیا، علاقہ مکینوں نے ڈاکوں کی درگت بنانا شروع کی تو پولیس نے انہیں دیہاتیوں سے بچاتے ہوئے گرفتار کر لیا۔

موضوعات:فائرنگ