تہران(این این آئی)مصنوعی سیارے سے لی گئی تازہ ترین تصاویر میں ایران کے نئے میزائل پلیٹ فارم کا انکشاف ہوا ہے۔ سیٹلائٹس سے ملنے والی تصاویر میں دیکھا گیا ہے کہ یہ میزائل پلیٹ فارم جنوب مغربی ایران کے علاقے بندر عباس کے قریب پہاڑی علاقے خورگومیں قائم ہے۔غیرملکی ذرائع ابلاغ کے مطابق ایک پہاڑ میں کل چار غاریں دکھائی گئی ہیں۔ ان میں سے تین غاریں تقریبا

مکمل ہیں جنہیں میزائل پلیٹ فارم کے لیے تقریبا مکمل ہوچکے ہیں اور میزائل لانچروں کے طور پر استعمال کیے جانے کے لیے تیار ہیں۔دستیاب معلومات کے مطابق اس سائٹ پر کام تین سال پہلے شروع ہوا تھا۔ اگر یہ پلیٹ فارم ایک بار مکمل آپریشنل صلاحیت حاصل کرلیتا ہے تو اس کے اثرات کو روکنا آسان نہیں ہو گا۔یہ پیش رفت ایک ایسے وقت میں سامنے آئی جب دوسری طرف ایرانی پاسداران انقلاب نے سمندر کے کنارے ایک نیا میزائل سٹی بنانے کا فیصلہ کیا ۔ایران کی سرکاری نیوز ایجنسی کی رپورٹ کے مطابق یہ میزائل سٹی پروجیکٹ ایرانی نیوی کے زیراہتمام شروع کیا گیا ہے۔ اس نئے منصوبے میں میزائل سازی کے لیے تنصیبات قائم کی جائیں گی۔منصوبے کا باقاعدہ افتتاح ایرانی پاسداران انقلاب کے سربراہ حسین سلامی کی زیرصدارت ہوا۔ میزائل سٹی کی افتتاحی تقریب میں ایرانی نیول چیف بریگیڈیئر علی رضا تنکسیری اور دیگر اعلی عسکری عہدیدار موجود تھے۔رپورٹ کے مطابق اس میزائل شہرمیں کروز میزائل سسٹم ، بیلسٹک میزائل اور مختلف رینج تک مار کرنے والے میزائلوں کی تیاری ایک بڑی تعداد شامل ہے۔اگرچہ اس رپورٹ میں اس میزائل شہرکے مقام کی وضاحت نہیں کی گئی ہے لیکن توقع کی جارہی ہے کہ یہ خلیج فارس یا بحیرہ عمان پر واقع پاسداران انقلاب کے اڈوں میں کسی ایک میں واقع ہوگا۔

موضوعات:ایران