اسلام آباد(مانیٹرنگ ڈیسک) ڈپٹی انسپکٹر جنرل موٹروے نارتھ محبوب اسلم نے کہا ہے کہ23 سے 31 مارچ تک شہریوں کو آگاہی فراہم کر کے ٹریفک قوانین پر عمل درآمد کرنے پر راغب کیا جائے، 31 مارچ کے بعد قوانین کی خلاف ورزی کرنے والوں کے لائسنسز کو کینسل اور گاڑیوں کو بند کردیں گے،موٹروے پولیس محدود وسائل میں رہ کر مسائل حل کر رہی ہے۔ بدھ کواسلام آباد میں پریس کانفرنس سے خطاب کرتے ہوئے انہوں نے کہا کہ 31 مارچ کے بعد ایک بھی شخص کو جی ٹی روڈ پر بغیر ہیلمٹ کے موٹر سائیکل اور چنگچی چلانے کی نہیں دی جائے گی،

ٹریفک کے مسائل فیز وائز حل کیے جائیں گے،جی ٹی روڈ کے ارد گرد تعمیرات اور مارکیٹس کی موجودگی سے زیادہ مسائل جنم لے رہے ہیں،لوگوں کی زندگیوں کا تحفظ ہماری اولین ترجیح ہے،غیر قانونی تعمیرات اور اور چنگچی رکشوں کی بھر مار کے خلاف فیز وائز کام کریں گے،ہم مسائل کو ایک دن میں نہیں آہستہ آہستہ حل کریں گے، شہریوں کا موٹروے پولیس کے حوالے سے اچھا تاثر ہے ،موٹروے پولیس شہریوں کی توقعات پر پوراتریں گی۔ان کا مزید کہنا تھا کہ حادثات کی وجہ سے ایک سال میں 143 اموات،153 لوگ زخمی ہوئے اور92 ہزار لوگوں کی امداد کی گئی،20 لاکھ27 ہزار چالان کیے گئے جس سے 91 کروڑ روپے جمع ہوئے،موٹروے کی بہ نسبت جی ٹی روڈ پر بے شمار مسائل کا سامنا ہے،موٹر سائیکل سوار ہیلمنٹ پہننے سے 50 فیصد حادثات سے بچا جا سکتا ہے،آگاہی کی فراہمی کیلئے اقدامات کیے جا رہے ہیں، ا س سلسلے میں مختلف سکولوں میں جا کر لیکچر دیا جائے گا اور پمفلٹس تقسیم کیے جائیں گے،آگاہی فراہم کرنا ہمارا کام اور اس پر عمل کرنا شہریوں کا فرض ہے،موٹروے افسران ہمہ وقت لوگوں کی رہنمائی کیلئے کوشاں ہیں، افسران کی اعلیٰ حکام سے رابطے کیلئے محکمہ میں خصوصی طور پر واٹس ایپ گروپس بھی بنائے گئے ہیں جس سے ٹریفک مسائل فوری اور حل کرنے میں مدد ملے گی،لوگ اپنے زندگیوں کو عزیز جانے او ر احتیاط سے گاڑی چلائیں، روڈ حادثات سے بچاؤ کیلئے سول سوسائٹی اور میڈیا کو ہمارا ساتھ دینا ہوگا، ہمیں اعزاز اور سرٹیفکٹس کی ضرورت نہیں ایک شخص کی بھی جان بچ جائے تو یہ ہمارے لیے اعزاز ہیں۔

موضوعات:لائسنس کینسل،گاڑی بند