لاہور (این این آئی ) بھارتی کوریو گرافر ریشماں نے کہا ہے کہ پاکستان میں ایک سے بڑھ کر ایک اداکار موجود ہے ،پاکستانی فلم ’’شور شرابا ‘‘کی شوٹنگ کے دوران مجھے اداکارہ رابی پیر زادہ کو قریب سے دیکھنے اور جاننے کا موقع ملا جس کے بعد میں یہ بات باآسانی کہہ سکتی ہوں کہ رابی پیرزادہ میں عالمی حسینہ بننے کی تمام خوبیاں موجود ہیں

اور ان کو میں نے مس ورلڈ بننے کے لئے مشورہ بھی دیا تھا مگر شاید اس کا گھریلو ماحول اس کو اس چیز کی اجازت نہیں دیتا ،اگررابی پیر زادہ بھارت میں ہوتی تو مس انڈیا کا ٹائٹل لازمی حاصل کرلیتی ۔ انہوںنے کہاکہ میرے نزدیک رابی پیرزادہ مس پاکستان ہیں ۔ ریشماں نے کہاکہ پاکستان میں فلم ’’شور شرابا ‘‘کے دوران مجھے جس قدر محبت ملی اسکو میں ساری زندگی فراموش نہیں کرسکتی ۔ انہوںنے کہاکہ فلم ’’شورشرابا ‘‘میں اپنی تمام صلاحیتیں استعمال کی ہیں اور مجھے یقین ہے کہ اس فلم کی کامیابی کے ساتھ اس کے گانے بھی زبردست ہٹ ہونگے ۔

موضوعات:رابی پیر زادہ