اسلام آباد(آئی این پی)وفاقی وزیر دفاع ، پانی وبجلی خواجہ محمد آصف نے کہا ہے کہ دہشت گردی کے خلاف جنگ دنیا کو محفوظ بنانے کے لئے لڑ رہے ہیں ، امریکہ نے ایف16کی فراہمی روک کر دہشت گردی کے خلاف جنگ میں غیر سنجیدگی کا ثبوت دیا ، پاکستان کی امداد روکنے سمیت دیگر پابندی لگانے سے امریکہ کے اپنے مفاد کو نقصان ہو گا ، امریکہ اگر چاہتا ہے کہ ہم صرف ان کی جنگ لڑیں تو ایسا ممکن نہیں ،ہمارے لئے اپنی ترجیحات سب سے پہلے ہیں ۔

وہ ہفتہ کو نجی ٹی وی سے گفتگو کررہے تھے ۔انہوں نے کہا کہ پاکستان اور امریکہ پچھلے 70سال سے دفاعی اور معاشی شعبوں میں پارٹنر ہیں ، اسلحہ سازی اور ٹیکنالوجی کے لحاظ سے امریکہ کی مارکیٹ بہت بڑی ہے ۔انہوں نے کہا کہ پاکستان دو طرح کی جنگ لڑ رہا ہے ، بھارت کے ساتھ لڑی جانے والی جنگ ہماری سالمیت کی ہے جبکہ دہشت گردی کے خلاف لڑی جانے والی جنگ صرف ہماری ہی نہیں بلکہ پوری دنیا کی سالمیت کے لئے ہے ۔

خواجہ آصف نے کہا کہ دہشت گردی کے خلاف جنگ میں پاکستان فرنٹ لائن پر ہے امریکہ نے ایف16کی فراہمی روک کر دہشت گردی کے خلاف جنگ میں غیر سنجیدگی کا ثبوت دیا اگر ہمیں محروم کیا جائے گا تو امریکہ کا اپنا بھی نقصان ہوگا،امریکہ کی نئی حکومت کو یہ بات سمجھنے کی ضرورت ہے ۔انہوں نے کہا کہ امریکہ اگر چاہتا ہے کہ ہم صرف ان کی جنگ لڑیں تو ایسا ممکن نہیں ،ہمارے لئے اپنی ترجیحات سب سے پہلے ہیں ۔(ار)

موضوعات:ایف16 دہشت گردی