پرتھ(آن لائن)پاکستانی امپائر علیم ڈار کو آنکھیں دکھانے والے آسٹریلوی کپتان اسٹیون اسمتھ کے سر پر پابندی کی تلوار لٹکنے لگی، امپائر سے الجھنے کے جرم میں سزا کا سامنا کرنا پڑسکتا ہے، دوسری جانب کینگرو قائد اپنی حرکت کی وضاحتیں دینے لگے، انھوں نے کہاکہ فیلڈ آفیشل کے فیصلے کی ہاک آئی نے توثیق کردی تو میں کیا کرسکتا ہوں، اسمتھ نے پرتھ میں گیند کے ریورس سوئنگ ہونے پر بھی حیرت ظاہر کردی۔تفصیلات کے مطابق پرتھ ٹیسٹ کے دوسرے روز آسٹریلوی کپتان اسٹیون اسمتھ کو جب علیم ڈار نے ایل بی ڈبلیو قرار دیا تو وہ غصے میں آگئے، انھوں نے نہ صرف انتہائی تجربہ کار امپائر کی جانب بدتمیزی سے بازو لہرایا بلکہ جارحانہ انداز میں ریویو بھی لیا، مگر تھرڈ امپائر نے بھی علیم ڈار کے فیصلے کو ٹیکنالوجی کی کسوٹی پر اچھی طرح پرکھنے کے بعد توثیق کردی۔اب ان پر آفیشلز کے فیصلے سے اختلاف کا چارج عائد ہونے اور سزا کا امکان ہے، اگر ایسا ہوا تو یہ ان کی 12 ماہ کے اندر دوسری لیول ون کی خلاف ورزی ہوگی ۔

موضوعات:آسٹریلوی کپتان علیم ڈار