فیصل آباد (این این آئی)وفاقی حکومت نے کرتارپور میں 74سال بعد ملنے والے بھائیوں کو ہر ممکن تعاون کی یقین دہانی کرائی ہے۔وزیراعظم عمران خان کے معاون خصوصی برائے سیاسی ابلاغ ڈاکٹر شہباز گل نے کرتارپور میں74 سال بعد بھائی سے ملنے والے محمد صدیق سے فیصل آباد میں ملاقات کی۔اس موقع پر شہباز گل نے کہاکہ دونوں بھائیوں کی ملاقات کیلئے حکومت ہرطرح سے تعاون کرے گی۔معاون خصوصی نے کہاکہ محمد صدیق کا

چھوٹا بھائی اگر پاکستان آنا چاہے تو پاکستانی سفارت خانہ اپنا کردارادا کریگا۔انہوں نے کہا کہ محمد صدیق کو بھائی سے ملنے بھارت جانے کیلئے ویزا میں بھی تعاون کیا جائے گا۔خیال رہے کہ گزشتہ دنوں قیامِ پاکستان کے وقت بچھڑنے والے دو بھائی 74 سال بعد کرتارپور میں ملے تھے۔دونوں بھائیوں کی دہائیوں بعد ہونے والی ملاقات میں رقت آمیز مناظر دیکھنے میں آئے، دونوں بھائی ایک دوسرے سے گلے ملے اور زارو قطار روتے رہے۔