اسلام آباد (این این آئی)پاک بحریہ کے غوطہ خور وں نے راول ڈیم میں ڈوبنے والی خاتون کی لاش نکال لی ۔ ترجمان پاک بحریہ کے مطابق سی ڈی اے اور اسلام آباد پولیس کی جانب سے دی جانے والی اطلاع پر پاک بحریہ کی جانب سے فوری سرچ آپریشن کیا گیا،پاک بحریہ کے

غوطہ خور عبدالرحمان نے تن تنہا رات کے اندھیرے میں سرچ آپریشن کرتے ہوئے لاش کو تلاش کر لیا۔ ترجمان پاک بحریہ کے مطابق تلاش کے بعد لاش کو لواحقین کے سپرد کر دیا گیا۔ ترجمان پاک بحریہ کے مطابق راول ڈیم پر موجود پاک بحریہ کی یہ غوطہ خور ٹیم گزشتہ کئی برسوں سے اسلام آباد سمیت شمالی علاقہ جات میں متعدد کامیاب سرچ آپریشن سرانجام دے چکی ہے۔ ترجمان پاک بحریہ کے مطابق اسلام آباد میں موجود اپنی نوعیت کی اس واحد غوطہ خور ٹیم کا اولین مقصد کسی بھی حادثے کی صورت میں عوام کو فوری معاونت فراہم کرنا ہے۔ ترجمان پاک بحر کے مطابق پاک بحریہ کے حوصلہ مند جوان کسی بھی ناگہانی صورت حال میں عوام کے جان و مال کے تحفظ کیلئے ہمہ وقت تیار ہیں۔