کراچی (این این آئی)دسمبر میں سوزوکی آلٹو گاڑیوں کی فروخت میں ریکارڈ اضافہ دیکھا گیاہے۔پاک سوزوکی نے اپنی سوزوکی آلٹو کی اب تک کی سب سے زیادہ ماہانہ گاڑیوں کی فروخت ریکارڈ کی ہے۔ پاکستان آٹو موٹیومینوفیکچررز ایسوسی ایشن(پی اے ایم اے)سے جاری کردہ اعدادوشمار کے مطابق دسمبر 2021 میں سوزوکی آلٹو کے 9 ہزار 195
یونٹس فروخت ہوئے۔اعداد و شمار کے مطابق نومبر میں 2 ہزار 420 یونٹس فروخت ہوئے اور دسمبر میں ماہانہ بنیاد پر آلٹو گاڑیوں کی قیمتوں میں اضافے کے باوجود فروخت میں 280 فیصد اضافہ ہوا ہے۔سوزوکی کے ایک کار ڈیلرنے بتایاکہ کمپنی نے نومبر میں کافی تعداد میں گاڑیاں بنائی تاہم وہ صرف 2 ہزار 420 یونٹس فروخت کرسکے کیونکہ انہوں نے نومبر کے وسط میں فیول لائن کے مسائل کی وجہ سے گاڑیوں کی ڈیلیوری روک دی تھی جو کہ دسمبر میں دوبارہ شروع کردی جس سے دسمبر میں گاڑیوں کی فروخت میں اضافہ دیکھا گیا۔ایسوسی ایشن آف پاکستان موٹرسائیکل اسمبلرز(اے پی ایم اے)کے چیئرپرسن محمد صابر شیخ کے مطابق آلٹو کی مانگ روز بروز بڑھ رہی ہے اور کمپنی ماہانہ 25 ہزار گاڑیاں فروخت کر سکتی ہے لیکن پاکستان میں فیکٹریاں ناکافی ہیں جس کے باعث کمپنی زیادہ گاڑیاں تیار کرنے کی صلاحیت نہیں رکھتی۔اس کے علاوہ کمپنی 40 فیصد پرزے مقامی طور پر تیار کرتی ہے اور اگر گاڑی
خراب ہو جائے تو مالک مناسب قیمت پر پرزے آسانی سے خرید سکتا ہے۔ انہوں نے مزید کہا کہ گاڑی کی ہیڈلائٹس، بمپر، کار سیٹ، بیک لائٹس اور بیٹریاں پاکستان میں تیار کی جاتی ہیں۔سوزوکی کمپنی نے 11 نومبر 2021 کو اپنی سب سے زیادہ فروخت ہونے والی 660 سی سی آلٹو کی قیمت میں ایک لاکھ 83 ہزار روپے تک کا اضافہ کیا تھا۔ سوزوکی وی
ایکس کی قیمت میں ایک لاکھ 61 ہزار روپیاضافے کے بعد قیمت 12 لاکھ 70 ہزار روپے ہوگئی۔ جبکہ آلٹو وی ایکس آر اور آلٹو وی ایکس ایل کی قیمت بالترتیب ایک لاکھ 73 ہزار روپے اور ایک لاکھ 83 ہزار روپے سے بڑھ کر 15 لاکھ 8 ہزار روپے اور 17 لاکھ روپے تک جا پہنچی۔ تجزیہ کار رضا جعفری نے بتایا کہ صارفین کی ترجیحات اور زیادہ مانگ
کی وجہ سے قیمتوں میں اضافہ طویل مدت میں فروخت کے اہداف کو نقصان نہیں پہنچا سکتا تاہم یہ اگلے چند مہینوں میں کاروں کی فروخت کو عارضی طور پر متاثر کر سکتا ہے۔ایک ڈیلر کے مطابق آلٹو وی ایکس اور وی ایکس آر پر اون منی ایک لاکھ روپے ہے۔ جبکہ آلٹو وی ایکس ایل دولاکھ روپے اون منی پر فروخت ہورہی ہے۔ اور توقع کی جارہی ہے کہ اگر مانگ میں مسلسل اضافہ ہوتا ہے تو اون منی مزید بڑھ سکتی ہے۔
