اسلام آباد (نیوز ڈیسک) جنوبی افریقا کے نوجوان اوپنر جورچ وین شالک وک نے انڈر 19 ون ڈے کرکٹ کی تاریخ میں ایک نئی مثال قائم کر دی ہے۔ 18 سالہ بلے باز نے یوتھ ون ڈے انٹرنیشنل میں پہلی مرتبہ ڈبل سنچری بنانے کا اعزاز حاصل کیا ہے۔یہ تاریخی اننگز انہوں نے ہرارے میں جاری سہ فریقی سیریز کے پہلے میچ میں زمبابوے انڈر 19 کے خلاف کھیلتے ہوئے انجام دی، جہاں انہوں نے صرف 153 گیندوں پر 215 رنز کی دھواں دار باری کھیلی۔

ان کے اس یادگار کھیل میں 19 چوکے اور 6 شاندار چھکے شامل تھے۔واضح رہے کہ اس سے پہلے یوتھ ون ڈے کرکٹ میں سب سے زیادہ انفرادی رنز کا ریکارڈ 191 تھا، جو 2018 میں سری لنکا کے ہسیتھا بویاگوڈا نے بنایا تھا۔ جورچ وین نے اس ریکارڈ کو پیچھے چھوڑتے ہوئے نئی تاریخ رقم کر دی۔ان کی بہترین اننگز کے باعث جنوبی افریقی انڈر 19 ٹیم نے مقررہ 50 اوورز میں 385 رنز کا پہاڑ جیسا اسکور کھڑا کیا، جس کے جواب میں زمبابوے کی پوری ٹیم صرف 107 رنز پر ڈھیر ہو گئی۔ میچ 25ویں اوور میں ہی اپنے اختتام کو پہنچا۔اس طرح جنوبی افریقا نے 278 رنز کی بڑی فتح حاصل کی اور سیریز کا فاتحانہ آغاز کیا، جبکہ جورچ وین کی اننگز نے یوتھ کرکٹ میں ایک سنہری باب کا اضافہ کیا۔