اسلام آباد (این این آئی)پاکستان کرکٹ بورڈ (پی سی بی ) کے چیئرمین محسن نقوی بھارتی کرکٹ بورڈ (بی سی سی آئی) کے سربراہ محسن نقوی کے درمیان ملاقات ہوئی تاہم اس دوران چیمپئنز ٹرافی 2025 کے حوالے سے بات چیت نہیں کی گئی۔

تفصیلات کے مطابق سری لنکا میں انٹرنیشنل کرکٹ کونسل ( آئی سی سی) کی سالانہ میٹنگ اختتام پذیر ہوگئی، 4 روزہ سالانہ اجلاس سری لنکا کے شہر کولمبو میں ہوا جس میں کھیل کے مختلف پہلوؤں، نئے قوانین بنانے، ٹی20 ورلڈکپ سمیت مختلف امور پر گفتگو کی گئی۔میٹنگ کی سائیڈ لائن پر بھارتی کرکٹ بورڈ کے سربراہ جے شاہ اور چیئرمین پی سی بی محسن نقوی کی ملاقات ہوئی، دونوں نے ایک دوسرے سے ہاتھ ملایا اور خوشگوار الفاظ کا تبادلہ کیا۔اجلاس میں پی سی بی، بی سی سی آئی اور آئی سی سی کی جانب سے پاکستان میں ہونے والے چیمپئنز ٹرافی 2025 پر کوئی بات نہیں کی گئی کیونکہ یہ آئی سی سی میٹنگ کے ایجنڈے میں نہیں تھا۔

ذرائع نے بتایا کہ آئی سی سی چیمپئنز ٹرافی 2025 شیڈول کے مطابق پاکستان میں ہی ہوگی، آئی سی سی چیمپئنز ٹرافی کے حوالے سے پی سی بی کے انتظامات سے خوش ہے۔آئی سی سی نے چیمپئنز ٹرافی 2025 کے بجٹ کی منظوری بھی دے دی ہے جس سے ایونٹ پاکستان میں ہونے کے امکانات مزید روشن ہوگئے ہیں تاہم بھارتی کرکٹ بورڈ نے اگر حکومت کی اجازت نہ ملنے کا بہانہ بنایا تو پاکستان اس پر تحریری جواب طلب کرے گا۔دوسری جانب افغانستان کرکٹ بورڈ نے بھی میڈیا پر چلنے والی خبروں کو مسترد کردیا، انہوں نے کہا کہ چیمپینز ٹرافی 2025 کے لیے افغانستان کی ٹیم پاکستان میں کھیلتی ہوئی نظر آئیگی۔