راولپنڈی(این این آئی)پی ایس ایل9میں اسلام آباد یونائیٹڈ نے کراچی کنگز کو 5وکٹوں سے شکست دیدی،151 رنز کا ہدف اسلام آباد یونائیٹڈ نے 18ویں اوور کی چوتھی گیند پرپانچ وکٹوں کے نقصان پرحاصل کرلیا،فہیم اشرف کو میچ کے بہترین کھلاڑی قرارپائے۔تفصیلات کے مطابق پنڈی کرکٹ سٹیڈیم میں اسلام آباد یونائیٹڈ نے ٹاس جیت کر کراچی کنگز کو پہلے بیٹنگ کی دعوت دی۔ کنگز نے مقررہ 20اوورز میں7وکٹوں کے نقصان پر 150رنز بنائے۔

کراچی کنگز کی جانب سے پولارڈ39، جیمز ونس29اور ٹم سیفرٹ 26رنز بنا کر نمایاں سکورر رہے۔ اسلام آباد یونائیٹڈ کی جانب سے ٹی ملز نے3، فہیم اشرف نے2جبکہ حنین شاہ اور عماد وسیم نے ایک، ایک وکٹ حاصل کی ۔ جواب میں میزبان اسلام آباد یونائیٹڈ کی ٹیم نے18.4اوورز میں ہدف عبور کرلیا۔یونائیٹڈ کی جانب سے شاداب خان34، سلمان علی آغا33، ہیلز18جبکہ حیدرعلی26رنز ناٹ آئوٹ اور فہیم اشرف12رنز ناٹ آئوٹ کیساتھ نمایاں سکورر رہے۔ کنگز کی جانب سے میرحمزہ نے3جبکہ مزاربانی اور زاہدمحمود نے ایک، ایک کھلاڑی کوآئوٹ کیا۔دو وکٹیں لینے والے فہیم اشرف کو میچ کا بہترین کھلاڑی قرار دیا گیا۔