لندن (آن لائن ) انٹرنیشنل کرکٹ کونسل (آئی سی سی) نے بھی اعتراف کرلیا کہ قومی ٹیم کے کپتان بابراعظم ٹی ٹونٹی فارمیٹ میں کم از کم 1000 رنز بنانے والے بلے بازوں کی فہرست میں ویرات کوہلی اور لوکیش راہول سے بہتر اوسط رکھتے ہیں۔ سوشل میڈیا ویب سائٹ ٹویٹر پر بات کرتے ہوئے دنیا کی کرکٹ گورننگ باڈی نے انکشاف کیا کہ بابراعظم کی اوسط 50.93 ہے اور ان کے
بعد ویرات کوہلی (50.05) اور لوکیش راہول (45.81) ہیں۔تینوں ٹی ٹونٹی کرکٹ میں کم از کم 1000 رنز بنانے والے بلے بازوں کی فہرست میں بہترین اوسط کے مالک کھلاڑی ہیں۔یاد رہے کہ پی ایس ایل فائنل میں بابراعظم نے لاہور قلندرز کے خلاف سلو وکٹ پر ناقابل شکست 63 رنز بنا کراپنی ٹیم کراچی کنگز کو پہلی بار پی ایس ایل چیمپئن بنوایا، انھوں نے اس ٹورنامنٹ میں مجموعی طور پر 473 رنزبنائے اور 3 مرتبہ مین اف دی میچ کا اعزاز حاصل کیا۔بابراعظم نے اس اننگز کے ساتھ رواں برس سب سے زیادہ ٹونٹی ٹونٹی رنز سکور کرنیوالے بلے بازوں کی فہرست میں اپنی ٹاپ پوزیشن کو مزید مستحکم کرلیا ہے، وہ رواں سال اب تک 32 میچز میں 56.45 کی ایوریج اور 136.63 کے سٹرائیک ریٹ سے 1242 رنز بنا چکے ہیں،انہوں نے گزشتہ سال بھی 1607 رنز سکور کیے تھے۔ متحدہ عرب امارات میں میں ا?ئی پی ایل میچز کھیلنے والے دیگر بلے باز بھی بابراعظم کے قریب تک نہیں پہنچ پائے، دوسرے نمبر پر موجود وکٹ کیپر بلے باز لوکیش راہول کے رنز کی تعداد 993 جب کہ 986 رنز کے ساتھ آسٹریلیوی آل رائونڈر مارکس سٹوئنس تیسرے نمبر پر ہیں، برطانوی بلے باز ایلکس ہیلز (928) رنز کے ساتھ چوتھے، جارح مزاج پاکستانی اوپنر فخرزمان (872) رنز بنا کر 5ویں، قومی ٹیم کے سابق کپتان محمد حفیظ (865) رنز کے ساتھ چھٹے اور آل رائونڈر شعیب ملک (827) رنز کے ساتھ ساتویں نمبر پر موجود ہیں۔
