لاہور (آن لائن)آئی سی سی مینز کرکٹ ورلڈکپ سپر لیگ میں پاکستان اپنے سفر کا آغاز راولپنڈی سے کرے گا۔ پاکستان اور زمبابوے کے درمیان 3 ون ڈے میچز 30 اکتوبر، یکم اور 3 نومبر کو پنڈی کرکٹ اسٹیڈیم راولپنڈی میں کھیلے جائیں گے۔ یہ تینوں میچز ابتدائی طور پر ملتان میں شیڈول تھے تاہم لاجسٹک اور آپریشنل وجوہات کی بناء پر انہیں راولپنڈی منتقل کردیا گیا ہے۔دوسری جانب راولپنڈی
میں شیڈول تینوں ٹی ٹونٹی میچز کی میزبانی اب لاہور کے سپرد کردی گئی ہے۔ یہ میچز 7، 8 اور 10 نومبر کو اب قذافی اسٹیڈیم لاہور میں کھیلے جائیں گے۔پاکستان کرکٹ بورڈ کے ڈائریکٹر انٹرنیشنل کرکٹ ذاکر خان کا کہنا ہے کہ لاجسٹک اور آپریشنل وجوہات کے سبب ملتان کا وینیو دستیاب نہیں تھا، لہٰذا ہم نے سیریز کے شیڈول کا دوبارہ جائزہ لیا اور ایک ایسا شیڈول ترتیب دیا ہے جو دونوں ٹیموں، میچ آفیشلز، براڈکاسٹرز اور دیگر متعلقہ حکام کے لیے موزوں ہے۔انہوں نے مزید کہا کہ ہم نومبر میں لاہور شہر میں متوقع سموگ کی صورتحال سے متعلق محکمہ موسمیات سے مسلسل رابطے میں رہیں گے اور اگر اس دوران کسی تبدیلی کی ضرورت پیش آئی تو اس پر غور کیا جائے گا۔ذاکر خان نے کہا کہ راولپنڈی کی دستیابی سے واضح ہوتا ہے کہ آئی سی سی مینز کرکٹ ورلڈکپ سپر لیگ کے میچوں کے انعقاد سے متعلق کوئی غیر یقینی نہیں اور پاکستان کوشش کرے گا وہ لیگ کا فاتحانہ آغاز کرکے زیادہ سے زیادہ پوائنٹس حاصل کرسکے۔اس سے قبل زمبابوے کی ٹیم نے آخری بار 2015 میں پاکستان کا دورہ کیا تھا، جہاں دونوں ٹیموں کے درمیان 3 ایک روزہ اور 2 ٹی ٹونٹی انٹرنیشنل میچز کھیلے گئے تھے۔ اس دورے کے بعد سری لنکا، بنگلہ دیش اور ایم سی سی کرکٹ ٹیموں نے بھی پاکستان میں مختلف طرز کی کرکٹ کے میچز کھیلے۔اس کے ساتھ ساتھ پی سی بی نے ایچ بی ایل پاکستان سپر لیگ کے
پانچویں ایڈیشن کے اب تک کھیلے گئے تمام میچز کی میزبانی بھی پاکستان میں ہی کی۔ ایونٹ کے بقیہ چاروں میچز اب 14، 15 اور 17 نومبر کو لاہور میں شیڈول ہیں۔جبکہ 20 اکتوبر کو زمبابوے کرکٹ ٹیم کی پاکستان آمدہوگی جبکہ 21تا 27اکتوبر کوقرنطینہ کی مدت اور پریکٹس شروع کی جائے گی 28اور 29 اکتوبر کو راولپنڈی کرکٹ اسٹیڈیم میں پریکٹس شروع کی جائے گی۔ پہلا ایک روزہ
میچ راولپنڈی سٹیڈیم میں 30 اکتوبر دوسرا ایک روزہ میچ راولپنڈی سٹیڈیم میں یکم نومبر جبکہ تیسرا اور آخری ایک روزہ میچ 3 نومبر کو راولپنڈی سٹیڈیم میں کھیلا جائے گا۔ بتایا گیا ہے کہ 4 نومبر کو ٹیم لاہور روانہ ہوگی جہاں 5 تا 6 نومبر کو قذافی سٹیڈیم
میں دونوں ٹیمیں پریکٹس کریں گی۔ دونوں ٹیمیں پہلا ٹی ٹونٹی 7 نومبر ، دوسرا ٹی ٹونٹی 8 نومبر جبکہ تیسرا اور آخری ٹی ٹونٹی میچ 10 نومبر کو قذافی سٹیڈیم میں کھیلیں جائیں گے۔ 12 نومبر کو زمبابوے ٹیم واپس اپنے ملک روانہ ہوجائے گی۔
