کراچی(این این آئی)پاکستان کے اسٹارآل رائونڈر اورپاکستان کرکٹ ٹیم کے سابق کپتان وسیم اکرم نے بارشوں کے باعث مسائل سے پریشان اہلیان کراچی سے ہمدردی کا اظہار کیاہے ۔قومی ٹیم کے سابق کپتان وسیم اکرم نے اپنی اہلیہ شنیرا اکرم کے ہمراہ اپنے ویڈیو پیغام میں بارشوں کی وجہ سے
مشکلات کا شکار اہلیان کراچی سے ہمدردی کا اظہار کیاہے۔اپنے ویڈیوپیغام میں انہوں نے کہاکہ میں اہلیان کراچی سے ہمدردی کرتے ہوئے ان کی سلامتی کے لیے دعا گو ہوں، انگلینڈ میں بیٹھ کر جو تصاویر اور ویڈیوز ہم دیکھ رہے ہیں وہ بہت ہی افسوسناک ہیں اور یہ سب دیکھ کر ہم بہت پریشان بھی ہیں، لہذا ہم اہلیان کراچی سے درخواست کرتے ہیں کہ وہ گھروں میں محفوظ رہیں اور کسی ضرورت کے بغیر گھروں سے باہر نہ نکلیں۔اپنے پیغام میں انہوں نے کہا کہ عام دنوں میں پانی کوترسنے والا شہر کراچی اب پانی میں ڈوبا ہوا ہے، میں اپنی اور پاکستان کرکٹ ٹیم کی جانب سے اہلیان کراچی سے ہمدردی کرتے ہوئے ان کی سلامتی کے لیے دعا گو ہوں۔وسیم اکرم کی اہلیہ شنیرا اکرم نے بھی عوام سے اپیل کی کہ وہ گھروں سے نہ نکلیں اور اپنے دوستوں یا پھر کسی دیگر محفوظ مقام پر پناہ لیں۔
