ولنگٹن(این این آئی)نیوزی لینڈ اور پاکستان کے درمیان پانچ ایک روزہ بین الاقوامی کرکٹ میچوں پر مشتمل سیریز کا پانچواں میچ 19 جنوری کو ولنگٹن میں کھیلا جائے گا، میزبان کیویز کو سیریز میں 4-0 کی فیصلہ کن برتری حاصل ہے، نیوزی لینڈ نے پاکستان کو چوتھے ون ڈے میں 5 وکٹوں سے شکست دیکر مسلسل چوتھے کامیابی اپنے نام کی۔ مسلسل فتوحات کے بعد میزبان کھلاڑیوں کے حوصلے بلند ہیں اور انہوں نے
گرین شرٹس کو سیریز میں وائٹ واش کرنے کو ہدف بنا لیا ہے ٗدونوں ٹیموں کے درمیان پانچواں اور آخری ون ڈے 19 جنوری کو کھیلا جائے گا۔ادھر نیوزی لینڈ کے خلاف آخری ون ڈے میچ کے لیے پاکستانی کرکٹ ٹیم ہملٹن سے ولنگٹن پہنچ گئی، چوتھے میچ میں بیٹنگ کے دوران گیند لگنے سے زخمی ہونے والے شعیب ملک بھی ڈاکٹرزکی کلیئرنس کے بعد ٹیم کے ساتھ ولنگٹن پہنچے۔ٹیم مینجمنٹ ذرائع کا کہنا ہے کہ تیزی سے ریکوری کی وجہ سے فی الوقت شعیب ملک کو اسکین کی ضرورت بھی نہیں ہے۔
