اسلام آباد (مانیٹرنگ ڈیسک) سری لنکا اور زمبابوے کے درمیان ون ڈے سیریز جاری ہے، سری لنکا اور زمبابوے کے دوسرے ون ڈے میچ میں سری لنکن اسپنر ونیدو ہسارنگا نے ڈیبیو میچ میں ہیٹ ٹرک کرکے کرکٹ کی دنیا میں تیسرے ایسے بالر بن گئے جنہوں نے اپنے پہلے ہی میچ میں ہیٹ ٹرک کی۔ زمبابوے اور سری لنکا کے درمیان جاری دوسرے ایک روزہ میچ میں مقررہ اوورز سے قبل ہی لیگ اسپنر کی شاندار ہیٹ ٹرک کی بدولت 155 رنز پر زمبابوے کی تمام ٹیم پویلین واپس پہنچ گئی۔ انیس سالہ لیگ اسپنر نے میلکوم والر،
ڈونلڈ ٹریپانو اور ٹینڈائی چتارا کی وکٹ حاصل کرکے شاندار ہیٹ ٹرک کی۔ ہسارنگا نے 2.4 اوورز میں 15 رنز دے کر تین کھلاڑیوں کو آؤٹ کیا۔ ایک روزہ کرکٹ کی تاریخ میں اس سے قبل جنوبی افریقہ کے ربادا اور بنگلہ دیش کے تیجو الاسلام اپنے افتتاحی میچ میں ہیٹ ٹرک کرنے کا اعزاز حاصل کر چکے ہیں۔ ہسارنگا نے ڈومیسٹک کرکٹ میں سری لنکا انڈر 19 ٹیم کی نمائندگی کرتے ہوئے 775 رنز بنارکھے ہیں جبکہ 12 فرسٹ کلاس میچز میں 16 وکٹیں بھی حاصل کر چکے ہیں۔ پہلے میچ میں زمبابوے نے سری لنکا کو چھ وکٹوں سے ہرایا تھا۔
