اسلام آباد (مانیٹرنگ ڈیسک) میامی ٹینس ٹورنامنٹ کیلئے فیورٹ قرار دی گئی ثانیہ مرزا اور بربورا سٹرائکوا کی جوڑی کو وومن ڈبلز کے فائنل میں غیرمتوقع طور پر گیبرائلا دبروسکی اور ییفن زو کے ہاتھوں شکست کا سامنا کرنا پڑا۔ اتوار کو کھیلے گئے میچ میں دبروسکی اور ییفن کی فتح کا سکور 4۔6 اور 4۔6 رہا۔ ثانیہ مرزا اور سٹرائکوا کی جوڑی کی یہ 2017ء میں
دوسری شکست ہے۔ اس سے پہلے انہیں سڈنی انٹرنیشنل ٹورنامنٹ میں بھی شکست کا سامنا کرنا پڑا تھا۔ ثانیہ اور سٹرائکوا نے پچھلے ماہ انڈیا میں بھی ایک ساتھ ٹورنامنٹ میں حصہ لیا تھا تاہم ان کی جوڑی کوارٹر فائنل تک ہی رسائی حاصل کر سکی۔ اس کے علاوہ جوڑی کو فروری میں قطر اوپن اور دبئی اوپن کے سیمی فائنلز میں بھی شکست کا سامنا کرنا پڑا۔
