اسلام آباد(مانیٹرنگ ڈیسک)پاکستان کرکٹ بورڈ نے بکیز سے رابطوں پر محمد عرفان کو معطل کر دیا۔تفصیلات کے مطابق محمد عرفان نے گزشتہ روز پی سی بی اینٹی کرپشن یونٹ کے سامنے اپنا بیان ریکارڈ کروایا تھا جس میں انہوں نے بکیز سے رابطوں کا اعتراف کیا ہے۔
بیان ریکارڈ کراتے ہوئے محمد عرفان کا کہنا تھا کہ ان کے والد کی وفات کے باعث وہ ذہنی دبائو کا شکار تھے اور مشکوک افراد سے ملاقات سے متعلق اطلاع نہ دے سکے ۔پاکستان کرکٹ بورڈ نے فاسٹ بائولر محمد عرفان کومعطل کرتے ہوئےان پر ڈومیسٹک اور بین الاقوامی کرکٹ کھیلنے پر عارضی طور پر پابندی عائد کر دی ہے جبکہ پاکستان کرکٹ بورڈ نے محمد عرفان کو سپاٹ فکسنگ سکینڈل میں چارج شیٹ تھماتے ہوئے 14روز میں جواب جمع کرانے کی ہدایت کر دی ہے۔۔واضح رہے کہ الزامات ثابت ہونے پر محمد عرفان کو 2سال کی سزا کا سامنا کرسکتے ہیں جس میں ان پر ڈومیسٹک سمیت بین الاقوامی کرکٹ کھیلنے پر پابندی عائد ہو سکتی ہے۔یاد رہے کہ محمد عرفان کا نام سپاٹ فکسنگ سکینڈل میں اس وقت سامنے آیا تھا جب دبئی میں جاری پی ایس ایل کے دوران اسلام آباد یونائیٹڈ کے اوپنر بلے بازوں خالد لطیف اور شرجیل خان کوضابطہ اخلاق کی خلاف ورزی اور مشکوک افراد کے ساتھ رابطے سامنے آنے پر معطل کر کے وطن واپس بھیج دیا گیا تھا جہاں پی سی بی کا اینٹی کرپشن یونـٹ ان کے خلاف تحقیقات جاری رکھے ہوئے ہے جبکہ دونوں کھلاڑی اس حوالے سے اپنے آپ کو بے گناہ قرار دیتے ہوئے تمام الزامات کو مسترد کر چکے ہیں اور موقف اختیار کیا کہ وہ کسی قسم کی سپاٹ فکسنگ میں ملوث نہیں جبکہ اس حوالے سے ناصر جمشید کا نام بھی لیا جارہا ہے جنہوں نے خالد لطیف اور شرجیل کو مبینہ بکی سے ملاقات کیلئے میسج کئے تھے۔
