لاہور(آئی این پی)دورہ ویسٹ انڈیز کے لئے قومی کرکٹ ٹیم کے تربیتی کیمپ کے لئے 25 کھلاڑیوں کے ناموں کو حتمی شکل دے دی گئی ہے۔ وکٹ کیپر بلے باز کامران اکمل اور اوپنر احمد شہزاد بھی تربیتی کیمپ کا حصہ ہونگے۔ پاکستان کرکٹ ٹیم کے چیف سلیکٹر انضمام الحق اور ہیڈ کوچ مکی آرتھر کی دورہ ویسٹ انڈیز کے لئے کھلاڑیوں کے ناموں پر مشاورت مکمل ہوگئی ہے۔ جس کے بعد 25 کھلاڑیوں کے ناموں کو حتمی شکل دے دی گئی۔ پاکستان کرکٹ بورڈ کے

چیئرمین شہریار خان نے تصدیق کی ہے کہ مصباح الحق نے دورہ ویسٹ انڈیز میں اپنی دستیابی سے آگاہ کر دیا ہے اور وہ پاکستان کی ٹیسٹ ٹیم کی قیادت کریں گے۔ پاکستان اور ویسٹ انڈیز کے درمیان سیریز کا آغاز ٹی ٹوئنٹی میچز سے 26 مارچ کو ہوگا۔ قومی کرکٹ ٹیم دورہ ویسٹ انڈیز کے دوران 3 ٹیسٹ، 3 ون ڈے اور 4 ٹی ٹوئنٹی میچز کی سیریز کھیلے گی۔ جس کے لئے تربیتی کیمپ 11 مارچ سے قذافی اسٹیڈیم لاہور میں شروع ہوگا۔  کھلاڑی 10 مارچ کو ٹیم مینجمنٹ کو رپورٹ کریں گے۔